নগাঁও, ২২ অক্টোবৰ: অসমতে অসমীয়া ভাষাক অপমান । বৰাক উপত্যকাত অসমীয়া ভাষাক অপমান কৰাক লৈ ৰাজ্যজুৰি প্ৰতিবাদ অব্যাহত আছে । এই কাণ্ডক লৈ বিভিন্ন দল-সংগঠনে ক্ষোভিত হৈ পৰিছে । শুকুৰবাৰে নগাঁৱত সদৌ অসম প্ৰাক্তন আলফা সমন্বয়ৰক্ষী সমিতিয়েও এই সন্দৰ্ভত প্ৰতিক্ৰিয়া ব্যক্ত কৰে । প্ৰাক্তন আলফা সমন্বয়ৰক্ষী সমিতিৰ সম্পাদক বিজয় হাজৰিকাই কয় যে, অসমত পুনৰ ১৯৬০-৭২ৰ পৰিৱেশ ঘূৰি আহিব নালাগে । দোষীক দৃষ্টান্তমূলক শাস্তি প্ৰদানৰ দাবী জনায় সম্পাদকগৰাকীয়ে ।
উল্লেখ্য যে, কেইদিনমান পূৰ্বে শিলচৰত অসমীয়া ভাষাত থকা জলজীৱন মিছনৰ বিজ্ঞাপনৰ হৰ্ডিঙত ক'লা ৰং সানি দিয়া হৈছিল । এই ঘটনাত জড়িত থকাৰ অভিযোগত আৰক্ষীয়ে দুজন অভিযুক্তক গ্ৰেপ্তাৰ কৰে যদিও পুনৰ জামিনত মুকলি কৰি দিয়ে । মাতৃভাষাক অপমান কৰা ঘটনাৰে জড়িত অভিযুক্তই জামিন লাভ কৰাক লৈ এতিয়া পুনৰ সৃষ্টি হৈছে ব্যাপক প্ৰতিক্ৰিয়াৰ ।
এই সন্দৰ্ভত প্ৰতিক্ৰিয়া প্ৰকাশ কৰি অসমীয়া ভাষাৰ ওপৰত এনে আক্ৰমণ কোনো কাৰণতে সহ্য কৰা নহ'ব বুলি সকীয়াই দিয়ে সদৌ অসম প্ৰাক্তন আলফা সমন্বয়ৰক্ষী সমিতিৰ সম্পাদক বিজয় হাজৰিকাই । লগতে বৰাক উপত্যকাৰ এই ঘটনাৰে জড়িত ব্যক্তিক কঠোৰ শাস্তি প্ৰদানৰ দাবী উত্থাপন কৰে ।
অসমত অসমীয়া আৰু বঙালী লোকৰ মাজত থকা সমন্বয় অটুট ৰাখিবলৈও আহ্বান জনায় । অসমত ১৯৬০ চনৰ পৰা ১৯৭২ চনলৈ হোৱা পৰিৱেশ পুনৰ অহাটো বিচৰা নাই বুলিও মন্তব্য কৰে বিজয় হাজৰিকাই । তেওঁ কয় যে, অসমীয়া ভাষাক অপমান কৰাৰ পৰিৱৰ্তে এতিয়া বাংলাদেশত হিন্দুৰ ওপৰত হোৱা আক্ৰমণৰ বিৰুদ্ধে সকলোৱে একগোট হৈ প্ৰতিবাদ কৰিব লাগিছিল । তেওঁ লগতে কয় যে, অসমীয়া, বঙালী এই সকলো ভাষাকে সন্মান কৰা উচিত ।
লগতে পঢ়ক : ভূপেন বৰাৰ কথাৰ কোনো মূল্য নাই : দিলীপ শইকীয়া
