কলিয়াবৰ, 11 ছেপ্তেম্বৰ: শাসনাধিষ্ঠ বিজেপি চৰকাৰে আদিবাসী লোকসকলক বিভিন্ন সময়ত প্ৰতাৰণা কৰাৰ অভিযোগ তুলি কলিয়াবৰত বিজেপি চৰকাৰৰ বিৰুদ্ধে সোচ্চাৰ অসম আদিবাসী ছাত্ৰ সন্থা চমুকৈ "আছা" ৷ বৃহস্পতিবাৰে বিভিন্ন সমস্যা সমাধানৰ দাবীৰে কলিয়াবৰৰ মিলন সংঘত এক সংবাদ মেলৰ আয়োজন কৰে আদিবাসী ছাত্ৰ সংগঠনটোৱে ৷
সংবাদমেলৰ জৰিয়তে দীৰ্ঘদিনৰ পৰা সংগঠনটোৱে জনাই অহা দাবীসমুহ শীঘ্ৰে পুৰণৰ বাবে চৰকাৰক আহ্বান জনায় সংগঠনটোৱে ৷ অন্যথা ইয়াৰ বিৰুদ্ধে তীব্ৰ আন্দোলন গঢ়ি তোলাৰ হুংকাৰ ছাত্ৰ সংগঠনটোৰ ৷ আদিবাসী লোক সকলক মাটিৰ পট্টাৰ সুৰক্ষাৰ লগতে সাংবিধানিক সুৰক্ষা কৱচ প্ৰদানৰ দাবীয়ো উত্থাপন কৰিলে সংবাদমেলত উপস্থিত বিষয়ববীয়া সকলে ৷
উল্লেখ্য যে, বৃহস্পতিবাৰৰ এই সংবাদমেলৰ পূৰ্বে জৰুৰী ভাৱে কেন্দ্ৰীয় সমিতিৰ কাৰ্যনিবাহক সভাত মিলিত হয় ছাত্ৰ সংগঠনটো বিষয়ববীয়া সকল ৷ বৈঠকৰ পাছতে এক সংবাদমেলৰ জড়িয়তে বিজেপি চৰকাৰৰ বিৰুদ্ধে সোচ্চাৰ হৈ পৰে অদিবাসী ছাত্ৰ সন্থাৰ কেন্দ্ৰীয় কমিটিৰ সম্পাদক প্ৰদীপ নাগ ৷
সংগঠনটোৰ দাবী সমুহ শীঘ্ৰে পুৰণ নকৰিলে 2021 চনৰ বিধানসভাৰ নিৰ্বাচনত উচিত শিক্ষা দিয়া হ'ব বুলি চৰকাৰক সকীয়াই দিয়ে সংগঠনটোৰ নেতা সকলে ৷
