নগাঁও,13 অক্টোবৰ: অৱশেষত মঙলবাৰে উদ্ধাৰ হ’ল লাওখোৱা অভয়াৰণ্যৰ বিলত সন্ধানহীন হৈ থকা চোৰাং মাছমৰীয়াৰ মৃতদেহ ৷ দুদিন পূৰ্বে নিশা সহযোগীৰ সৈতে অভয়াৰণ্যখনৰ সংৰক্ষিত চৈধ্যমাইল বিলত চোৰাংকৈ মৎস্য চিকাৰৰ বাবে প্ৰৱেশ কৰিছিল নাজিৰুল হক নামৰ মাছমৰীয়াজন । উক্ত সময়তে চোৰাং মাছমৰীয়াৰ বিৰুদ্ধে অভিযান অব্যাহত ৰাখিছিল বনকৰ্মীৰ এটা দলে ।
সেই অভিযানৰ সময়তে পলায়নৰ চেষ্টা কৰি পৰৱৰ্তী সময়ত নিখোজ হৈ পৰিছিল নাজিৰুল । বিগত দুটা দিনে সন্ধানহীন চোৰাং মাছমৰীয়াজনক বিচাৰি এছডিআৰএফৰ সহায়ত বন বিভাগৰ লোকে অব্যাহত ৰাখিছিল অভিযান । অৱশেষত মঙলবাৰে পুৱা বন বিভাগ আৰু এছডিআৰএফ বাহিনীৰ দুদিনীয়া অভিযানৰ অন্তত উদ্ধাৰ হয় নাজিৰুলৰ মৃতদেহ ।
