কলিয়াবৰ,24 ফেব্ৰুৱাৰীঃ বিগত বৰ্ষৰ বাৰিষাত ব্ৰহ্মপুত্ৰৰ বুকুত জাহ গৈছিল কলিয়াবৰৰ বৰঘূলী কৃষি বান্ধ ৷ যাৰ ফলত হাজাৰ বিঘা কৃষিভূমি, ভেটি-মাটি, ঘৰ-দুৱাৰ, বিদ্যালয় ব্ৰহ্মপুত্ৰ বুকুত জাহ যায় ৷ বিগত বৰ্ষৰ খহনীয়াৰ পিছতেই খহনীয়া ৰোধৰ বাবে হাতত লোৱা হৈছিল গাইড বান্ধ নিৰ্মাণৰ কাম ৷ কিন্তু কলিয়াবৰৰ বৰঘূলীত ব্ৰহ্মপুত্ৰৰ পাৰত প্ৰায় তিনি কিলোমিটাৰ দৈৰ্ঘৰ জিঅ'বেগৰ গাইড বান্ধ নিৰ্মাণত দুৰ্নীতিৰ অভিযোগ উত্থাপন কৰিছিল স্থানীয় ৰাইজে ৷
জল সম্পদ বিভাগৰ বিষয়া-কৰ্মচাৰীয়ে বন্ধ নিৰ্মানত নিম্নমানৰ জিঅ'বেগ ব্যৱহাৰ কৰা কাৰ্যত ক্ষোভিত হৈ পৰিছিল বৰঘূলীৰ নৈপৰীয়া ৰাইজ ৷ উল্লেখ্য যে, বন্ধটো নিৰ্মানৰ ক্ষেত্ৰত ব্যৱহাৰ কৰা জিঅ'বেগসমূহৰ ৮০ শতাংশই নিম্নমানৰ বুলি দাবী কৰিছিল স্থানীয় ৰাইজে ৷
আনহাতে, এই গাইড বান্ধটো নিৰ্মানত সংঘটিত হোৱা দুৰ্নীতিৰ অভিযোগৰ বাতৰি ইটিভি ভাৰতত বিগত ৩১ ডিচেম্বৰত সম্প্ৰচাৰ হোৱাৰ পিচতে গা-লৰিল জল সম্পদ বিভাগৰ ৷ বৰ্তমান ব্যৱহাৰ হোৱা জিঅ'বেগসমূহ পূৰ্বৰ তুলনাত উন্নত বুলি মত প্ৰকাশ কৰে স্থানীয় ৰাইজে ৷ ৰাইজৰ প্ৰতিবাদ পিছতেই জল সম্পদ বিভাগৰ সামগ্ৰী যোগান ধৰোতা ‘চানটেক’ৰ নিম্ন মানৰ জিঅ’বেগ যোগান বাতিল কৰাৰ পিচত ‘ফ্লেক্সীটাফে’ যোগান ধৰা জিঅ'বেগ পূৰ্বৰ তুলনা উন্নত বুলি জনাই স্থানীয় বাসিন্দাই ৷
লগতে পঢ়ক-চিৰাঙত বিজেপিৰ মানাস সেৰফাং মণ্ডল কমিটীৰ কৰ্মী সভা
