নিউজ ডেস্ক, 13 এপ্ৰিল : পূৰ্বৰ পৰম্পৰা অটুট ৰাখি অনুষ্টুপীয়াকৈ হ'লেও বিহু পালন কৰিছে অসমীয়াই ৷ ঘৰতেই গৰুক গা ধুৱাই বিহুৰ যথা ৰীতি পালন কৰিছে অসমীয়া ৰাইজে ৷ আগৰ দৰে সমূহীয়াকৈ নৈ-বিলত গৈ একেলগে গাঁৱৰ গঞাই গৰুক গা ধুৱাব পৰা নাই ৷ কৰ'ণা আতংকৰ মাজতে বুকুত এবোজা দুখ বান্ধি গৰু বিহুৰ নিয়ম পালন কৰিছে লোক সকলে ৷ এফালে লক্ ডাউন আৰু আনফালে সাতামপুৰুষীয়া পৰম্পৰা ৷ দুয়োকুল বজাই ৰাখি ঘৰতেই গৰুক গা ধুৱাইছে গাঁওবাসীয়ে ৷
টীয়কৰ জাঁজী নৈৰ পাৰত নাই পূৰ্বৰ দৰে পৰিবেশ ৷ গৰু বিহুৰ উলহ মালহৰ পৰিৱৰ্তে নিমাও মাও হৈ ৰৈছে জাঁজীৰ পাৰ ৷ সামাজিক ব্যৱধান বজাই ৰাখি কেৱল কেইগৰাকীমান লোক আহিছে নৈৰ ঘাটলৈ ৷ টিংখাঙৰ কেন্দুগুড়িত সামাজিক দূৰত্ব বজাই ৰাখি পৰম্পৰা ৰক্ষা । বিহু বলিয়া মনটোক সামৰিব নোৱাৰি দিৰৈ নৈৰ ঘাটত গৰু গা ধুৱাই বিহু পালন কৰিলে ৰাইজে ৷ যোৰহাটৰ কৰঙা কাটনিবাৰী গাঁৱতো বিহুৰ পৰম্পৰা ৰক্ষা কৰিলে ৰাইজে ৷ খুমটাইৰ বিধায়ক মৃণাল শইকীয়াই গৰু বিহুৰ পুৱাই ঘৰতে গৰুক গা ধুৱাই পালন কৰিলে গৰু বিহু । গোলাঘাটত দেখা গৈছে সকলোৱে নিজৰ ঘৰতে গৰুক গা ধুৱাই পালন কৰিছে গৰু বিহু । প্ৰকৃতিৰ এই দুৰ্যোগৰ সময়ত ৰঙালীক ঘৰৰ ভিতৰত থাকিয়ে আদৰিবলৈ ৰাইজক আহ্বান বিধায়ক মৃণাল শইকীয়াৰ । বটদ্ৰৱা, নগাঁও, ডিব্ৰুগড়, মৰাণ, টিংখাং, মৰিগাঁও, দৰং,বৰপেটা আদি সকলোতে বিহুবুলি কেৱল নিয়মটোহে কৰা দেখা গ'ল অসমীয়া ৰাইজক ৷
কৰ'ণা ভাইৰাছ আৰু লক্ ডাউনে বিহুৰ উচাহ ম্লান পেলালেও, বাপতি সাহোন বিহুটি জানো পালন নকৰাকৈ থাকিব পাৰি ! ইটিভি ভাৰতৰ তৰফৰ পৰাও সকলোকে বিহুৰ শুভেচ্ছা জনোৱাৰ লগতে, মহামাৰীৰ এই সময়ত সজাগ হৈ বিহু পালন কৰিবলৈ অনুৰোধ জনালো ৷
লগতে পঢ়ক : হেঁপাহৰ বিহুটি হেঁপাহৰ ঘৰখনতে পালন কৰকঃ আঙুৰলতা ডেকা
