বটদ্ৰৱা, 26 ফেব্ৰুৱাৰীঃ আৱিৰৰ ৰঙেৰে ৰঙীণ হ'ব গুৰুজনাৰ পৱিত্ৰ জন্মস্থান ৷ মিলন বাৰ্তাৰে সমাগত বৰদোৱাৰ দৌলোৎসৱ ৷ প্ৰাণ উতলা ফাগুনৰ যেন এক এৰাব নোৱাৰা অংগ ফাকুৱা ৷ তাহানিৰে পৰা দাঙি ধৰা অপূৰ্ব আদৰ্শক সৰোগত কৰি পূৰ্বৰ দৰে এইবেলিও গুৰুজনাৰ জন্মস্থানত আয়োজন কৰা হৈছে শ্ৰীকৃষ্ণৰ দৌল মহোৎসৱ ৷ পাঁচদিনীয়া ভিন্ন কাৰ্যসূচীৰে অহা 4 মাৰ্চৰ পৰা 12 মাৰ্চলৈ আয়োজন কৰা হৈছে এই পৰম্পৰাগত ফল্গুৎসৱটি ৷ দৌল মহোৎসৱৰ বাবে ইতিমধ্যে প্ৰস্তুতি প্ৰায় সম্পূৰ্ণ কৰিছে থান পৰিচালনা সমিতিয়ে ৷
চুণ তেল সানি আটক ধুনীয়াকৈ সজাই তোলা হৈছে বটদ্ৰৱা থানৰ দেৱালসমূহ, সজাই তোলা হৈছে থানৰ চৌহদ ৷ প্ৰায়েই সম্পূৰ্ণ হৈছে অতিথি আদৰাৰ প্ৰস্তুতিও ৷ মহোৎসৱৰ আটাইকেইটা দিনতেই প্ৰদৰ্শিত কৰা হ'ব গুৰুজনাৰ অপূৰ্ব সৃষ্টি অংকীয়া ভাওনাৰ লগতে সত্ৰীয়া নৃত্য ৷ লগতে থাকিব বৰ্ণাঢ্য আয়োজনেৰে পৰম্পৰাগত ভিন্ন সাংস্কৃতিক অনুষ্ঠান ৷ মহোৎসৱ উপলক্ষে বুধবাৰে বটদ্ৰৱা থান পৰিচালনা সমিতিয়ে অনুষ্ঠাৰ কৰে এক সংবাদমেল ৷ সংবাদমেলত দৌল উৎসৱৰ কাৰ্যসূচী উন্মোচন কৰাৰ লগতে সকলোৰে সহযোগিতা কামনা কৰে থান পৰিচালনা সমিতিয়ে ৷
লগতে পঢ়কঃ বিটিআৰ নিৰ্বাচনঃ নিৰ্বাচনী ৰণডংকা ইউপিপিএলৰ
