নগাঁও, 11 আগষ্ট : ৰকিবুলৰ সন্মুখত এক প্ৰকাৰ মৌন ভূপেন বৰা ৷ নগাঁৱত সংবাদ মেল আয়োজন কৰি যেন ৷ কথা কোৱাৰ সুযোগেই নাপালে ভূপেন বৰাই ৷ সাংবাদিকৰ প্ৰশ্ন ভূপেন বৰাক ৷ উত্তৰ দিয়ে ৰকিবুল হুছেইনে ৷ সদায় ফ্ৰণ্ট লাইনত থাকিব বিচৰা এজন কংগ্ৰেছ নেতা । নাম ৰকিবুল হুছেইন ৷
ৰকিবুল হুছেইন আছে য'ত, বেলেগে কথা কোৱাৰ সুযোগ পায় ক'ত ? হয়, বৃহস্পতিবাৰে যেন এনে এক অৱস্থাই হ'ল নগাঁও ৰজীৱ ভৱনত । বৃহস্পতিবাৰে নগাঁৱত উপস্থিত হৈ নগাঁও ৰাজীৱ ভৱনত সংবাদ মেল আয়োজন কৰিছিল অসম প্ৰদেশ কংগ্ৰেছৰ সভাপতি ভূপেন বৰাই (Bhupen Bora held press conference in Nagaon) ।
বৃহস্পতিবাৰে নগাঁৱৰ ৰাজীৱ ভৱনত আয়োজন কৰা সংবাদ মেলত এফালে ৰকিবুল হুছেইন আৰু আনফালে ৰকিবুলৰ ঘনিষ্ঠ বিধায়ক নুৰুল হুদা । মাজত ভূপেন বৰা ৷ সংবাদ মেলৰ আৰম্ভণি ৰকিবুল হুছেইনৰ । সামৰণিও ৰকিবুল হুছেইনৰেই । সংবাদ মেলৰ উদ্দেশ্য 75 বছৰীয়া স্বাধীনতা দিৱস ।
স্বাধীনতা দিৱসৰ 75 বছৰ উপলক্ষে ৰাজ্যৰ প্ৰতিগৰাকী সাংবাদিকক কংগ্ৰেছে প্ৰদান কৰিব ত্ৰিৰংগা পতাকা । আৰম্ভণি নগাঁৱৰ পৰাই । সংবাদ মেলত দুই চাৰি কথা ক’বহে পালে ভূপেন বৰাই ৷ তাৰ পিছতেই সংবাদ মেল আয়োজন কৰা অসম প্ৰদেশ কংগ্ৰেছৰ সভাপতি ভূপেন বৰাক প্ৰশ্ন সাংবাদিকৰ ৷
8 কংগ্ৰেছী বিধায়কে বিজেপিত যোগদান কৰিব বুলি বিজেপি বিধায়ক প্ৰশান্ত ফুকনৰ মন্তব্যৰ প্ৰতিক্ৰিয়া কি হ'ব আপোনাৰ ? উত্তৰ ৰকিবুলৰ ৷ ভূপেন বৰাক পুনৰ প্ৰশ্ন সাংবাদিকৰ । উত্তৰ দিলে ৰকিবুল হুছেইনে । এনেদৰে সাংবাদিকৰ এটাৰ পিছত এটা প্ৰশ্নৰ উত্তৰ দি গ'ল প্ৰচাৰমুখী কংগ্ৰেছ নেতা ৰকিবুল হুছেইনে । যেন ৰকিবুল হুছেইনৰ সন্মুখত এক প্ৰকাৰ মৌন হৈ বহি থাকিবলগীয়া হ'ল অসম প্ৰদেশ কংগ্ৰেছৰ সভাপতি ভূপেন বৰা ।
উল্লেখযোগ্য যে, কেইদিনমান পূৰ্বে অসম প্ৰদেশ কংগ্ৰেছৰ সভাপতি ভূপেন বৰা আৰু বিধায়ক ৰকিবুল হুছেইনৰ মাজত হোৱা সংঘাতৰ বাতৰিয়ে দখল কৰিছিল সংবাদ শিৰোনাম । অৱশ্যে সেয়া অসম প্ৰদেশ কংগ্ৰেছে নস্যাত কৰাৰ পিছত বৃহস্পতিবাৰে নগাঁৱৰ সংবাদ মেলত ভূপেন বৰাক যেন নিশ্চুপ কৰি ৰাখিলে চতুৰ ৰকিবুল হুছেইনে ।
নগাঁও ৰাজীৱ ভৱনত বৃহস্পতিবাৰে আয়োজন কৰা অসম প্ৰদেশ কংগ্ৰেছৰ সংবাদ মেলত পৰিলক্ষিত নহ'ল জিলা কংগ্ৰেছৰ সভাপতিৰ উপস্থিতি ৷
লগতে পঢ়ক : Next Chief Secretary of Assam: ৰাজ্যৰ পৰৱৰ্তী মুখ্য সচিব পৱন কুমাৰ বৰঠাকুৰ
