বঢ়মপুৰ, 24 জুন : প্ৰধানমন্ত্ৰী গ্ৰাম চড়ক যোজনা আঁচনি(Pradhan Mantri Gram Sadak Yojana Scheme) জৰিয়তে ৰাজ্য চৰকাৰে গ্ৰামাঞ্চলৰ বাটপথ উন্নীতকৰণৰ কাম হাতত লৈছে ৷ কিন্তু এই আঁচনিৰ অধীনত কামপুৰত পথ নিৰ্মাণত দুৰ্নীতি সংঘটিত হোৱাৰ অভিযোগ উঠিছে ৷ কঠিয়াতলী পথৰ পৰা কঁঠালগুৰি সংযোগী নিৰ্মাণ হোৱা ২ কি:মি: দৈৰ্ঘৰ পথটোৰ নিৰ্মাণৰ কামত কোটি টকা দুৰ্নীতিৰ অভিযোগ উত্থাপন হৈছে ।
প্ৰাপ্ত তথ্য মতে ভাৰত চৰকাৰৰ গ্ৰাম্য উন্নয়ন মন্ত্ৰালয়(Ministry of Rural Development, Government of India)ৰ পুঁজিৰ দ্বাৰা প্ৰায় ৩ কোটি টকাৰ ব্যয় সাপেক্ষে কামপুৰ কঠিয়াতলী পথৰ পৰা কঁঠালগুৰিৰ আপাৰ বৰগাঁও লালুংগাঁও সংযোগী পথটোৰ নিৰ্মাণৰ কামত ব্যাপক অনিয়ম সংঘটিত হোৱাৰ অভিযোগ ৷ কিন্তু পথ নিৰ্মাণৰ কিছুদিন পাচতে অতি নিম্ন মানদণ্ডৰ সামগ্ৰী ব্যৱহাৰ কৰা বাবে পথটো জহি খহি গৈছে বুলি অভিযোগ কৰিছে স্থানীয় ৰাইজে । সম্প্ৰতি অঞ্চলটোৰ ৰাইজ পথ নিৰ্মাণৰ দায়িত্বত থকা ঠিকাদাৰ ধ্ৰুৱজ্যোতি বৰগোঁহাইৰ বিৰুদ্ধে ক্ষোভিত হৈ পৰিছে ৷
পথটোৰ বিভিন্ন স্থানত চি চি ব্লক এৰাই যহি খহি গৈ যাতায়তৰ অনুপযোগী হৈ পৰিছে পথটো ৷ যাৰ বাবে জাঙুৰ খাই উঠিছে স্থানীয় ৰাইজ ৷
ৰাইজৰ অভিযোগ ঠিকাদাৰ ধ্ৰুৱজ্যোতি বৰগোঁহাইয়ে কণা হাঁহক পতান দিয়াৰ দৰে পথটো নিৰ্মাণ কৰাত নিম্নমানৰ সামগ্ৰী ব্যৱহাৰ কৰাৰ লগতে নিজৰ মইমতালিৰে পথটো নিৰ্মাণ কৰাৰ বাবেই পথটোৰ এনে দূৰৱস্থা ৷ আনহাতে, পথটো নিৰ্মাণ কাৰ্য চোৱাৰ দায়িত্বত গড়কাপ্তানী বিভাগৰ আছিল যদিও বৰ্তমান কুম্ভকৰ্ণ নিদ্ৰাত গড়কাপ্তানী বিভাগ ৷ নতুন চৰকাৰ গঠন হোৱাৰ পাচৰে পৰা ৰাজ্যক দুৰ্নীতিমুক্ত কৰাৰ কথা কৈ আহিছে ৷
এতিয়া ব্যাপক অনিয়ম সংঘটিত কৰি নিৰ্মাণ কৰা পথটোৰ ঠিকাদাৰৰ বিৰুদ্ধে ৰাজ্য চৰকাৰে(State Government) কি ব্যৱস্থা গ্ৰহণ কৰে সেইয়া হ’ব লক্ষণীয় ৷
লগতে পঢ়ক : কেইবাটাও গুৰুত্বপূৰ্ণ কাৰ্যসূচীৰে সৰভোগত মুখ্যমন্ত্ৰী ডঃ হিমন্ত বিশ্ব শৰ্মা
