কলিয়াবৰৰ চাহ বাগিচাত কেশৱ মহন্তৰ জয়ধ্বনি

দেওবাৰে কলিয়াবৰৰ শাকমুঠীয়া চাহ বাগিচাত অগপ-বিজেপিৰ মিত্ৰজোঁটৰ প্ৰাৰ্থী কেশৱ মহন্তৰ হৈ প্ৰচাৰ ভোটাৰ ৰাইজৰ ৷ ঝুমুৰ নৃত্যৰ তালে-তালে মন্ত্ৰী কেশৱ মহন্তৰ জয়ধ্বনি দি পদযাত্ৰা অগপৰ সমৰ্থকসকলৰ ৷

কলিয়াবৰ,21 মাৰ্চ: কলিয়াবৰৰ শাকমুঠীয়া চাহ বাগিচাৰ বিভিন্ন অঞ্চলত দেওবাৰে অগপৰ সমৰ্থনত হিলদল ভাঙি ওলাই আহিছে ভোটাৰ ৰাইজ । পাঁচ বছৰীয়া কাৰ্যকালত মুখ্যমন্ত্ৰী সৰ্বানন্দ সোণোৱাল নেতৃত্বাধীন চৰকাৰে চাহ বাগিচাত কৰা উন্নয়নমূলক কাম-কাজৰ প্ৰভাৱত চাহ জনগোষ্ঠীৰ লোকসকল থিয় দিছে অগপ-বিজেপি মিত্ৰজোঁটৰ প্ৰাৰ্থী কেশৱ মহন্তৰ কাষত ।

সহস্ৰাধিক পুৰুষ-মহিলা, যুৱক-যুৱতী সমৰ্থকে হাতে-হাতে অগপৰ পতাকা লৈ কেশৱ মহন্ত জিন্দাবাদ, নৰেন্দ্ৰ মোডী জিন্দাবাদ ধ্বনিৰে বাগান অঞ্চলৰ প্ৰতিগৰাকী ভোটাৰক আকৰ্ষণ কৰাৰ চেষ্টা কৰে । ঝুমুৰ নৃত্যৰ তালে-তালে অগপৰ সমৰ্থকসকলে মন্ত্ৰী কেশৱ মহন্তৰ জয় ধ্বনি দি পদযাত্ৰা কৰে ৷

উল্লেখ্য যে, বিগত সময়চোৱাত চাহ বাগিচা অঞ্চলত হোৱা সামগ্ৰিক উন্নয়নে এসময়ৰ ঘোৰ কংগ্ৰেছী সমৰ্থকসকলক অগপমুখী কৰি তোলাত এইবেলি মিত্ৰজোঁটৰ প্ৰাৰ্থী কেশৱ মহন্তই কলিয়াবৰৰ বাগিচা অঞ্চলৰ ভোটাৰৰ বিপুল সমৰ্থন আদায় কৰিবলৈ সক্ষম হৈছে ।

লগতে পঢ়ক: কংগ্ৰেছ প্ৰাৰ্থী সূৰুজ দিহিঙীয়াৰে আছুতীয়া সাক্ষাৎকাৰ...