নগাঁও, 12 জানুৱাৰী: নাগৰিকত্ব সংশোধনী আইন বাতিলৰ দাবীত দেওবাৰে জুৰীয়াৰ দগাঁৱত আমছুৰ উদ্যোগত নগাঁও জিলা সমিতিৰ সহযোগত "জনতাৰ প্ৰতিবাদ" শীৰ্ষক গণ সমাবেশ অনুষ্ঠিত হয় ৷ দগাঁও আঞ্চলিক খেল পথাৰত অনুষ্ঠিত জনতাৰ প্ৰতিবাদ অনুষ্ঠানত উপস্থিত থাকি বিশিষ্ট সমাজকৰ্মী তথা প্ৰতিবাদী কন্ঠ মনজিৎ মহন্তই "বিজেপি চৰকাৰ সম্পূৰ্ণৰূপে অগণতান্ত্রিক আৰু ফেচীবাদী চৰকাৰ বুলি মন্তব্য কৰে ৷ লগতে নৰেন্দ্ৰ মোডী আৰু অমিত শ্বাহক সকীয়নি দি কয় যে, আমি ভাৰতক হিন্দু ৰাষ্ট্ৰ কৰিব নিদিও, অসমত দুটা জধা মূৰ্খ আছে, এটা সৰ্বানন্দ আনটো হিমন্ত বুলি তাচ্ছিল্য কৰি এশটা শিয়াল মৰিলে এটা হিমন্তৰ জন্ম হয় বুলিয়ো মন্তব্য কৰে ।
নগাঁও জিলাৰ উত্তৰ-পশ্চিম অঞ্চলৰ দহ সহস্ৰাধিক ৰাইজক উদ্দেশ্যি মনজিৎ মহন্তই ৭১ ৰ পাছৰ এজনো বাংলাদেশীক অসমৰ ৰাইজে গ্ৰহণ নকৰো বুলি সকিয়াই দিয়ে । প্ৰয়োজন হ'লে 800 নহয় 8000 শ্বহীদ হ'ম বুলিয়ো মন্তব্য কৰে বিশিষ্ট সমাজ কৰ্মীগৰাকীয়ে ৷ আমছুৰ কেন্দ্ৰীয় সমিতিৰ সভাপতি ৰেজাউল কৰিম চৰকাৰে আঁত ধৰা জনতাৰ প্ৰতিবাদত বিশিষ্ট অধিবক্তা শান্তনু বৰঠাকুৰে "নৰেন্দ্ৰ মোডী, অমিত শ্বাহ নেতৃত্বাধীন ভাৰত চৰকাৰে সংবিধানৰ আত্মা ধ্বংস কৰিব ওলাইছে বুলি মন্তব্য কৰে।
দেওবাৰে পুৱা ১১ বজাৰ পৰা অনুষ্ঠিত জনতাৰ প্ৰতিবাদত অংশগ্ৰহণ কৰি গণ শিল্পী সূৰ্য দাস, আমান উদ্দিন, শদিয়াৰ গায়ক ৰাজীৱ চেতিয়া, জাভেদ আলম, মিন্টু মনি দাস আদি কেইবাগৰাকী গায়কে গীতেৰে প্ৰতিবাদ সাব্যস্ত কৰে ৷ বিশাল জনতাৰ প্ৰতিবাদত উপস্থিত থাকি বিশিষ্ট সমাজকৰ্মী মীৰা বৰঠাকুৰেও সৰ্বানন্দ সোণোৱাল আৰু হিমন্ত বিশ্ব শৰ্মাই অসমীয়া জাতি আৰু ভাষাক বাংলাদেশত বন্ধকত দিবলৈ চেষ্টা কৰিছে বুলি মন্তব্য কৰে । দেওবাৰৰ এই সভাত আমছুৰ উপদেষ্টা আজিজুৰ ৰহমান, কাৰ্যকৰী সভাপতি আইন উদ্দিন আহমেদ, সাধাৰণ সম্পাদক মোশ্বাৰফ হুছেইন কবিৰ লগতে দহ সহস্ৰাধিক জনতা আৰু কেবাগৰাকীয়ো বিশিষ্ট ব্যক্তি উপস্থিত থাকে ।
