মৰিগাঁও, 7 অক্টোবৰ : বাঙালী যুৱ ছাত্ৰ ফেডাৰেশনৰ নাম লৈ ৰাজনৈতিক দল গঠনত প্ৰতিক্ৰিয়া । ইটিভি ভাৰতৰে আছুতীয়া সাক্ষাৎকাৰত সদৌ অসম বাঙালী যুৱ ছাত্ৰ ফেডাৰেশ্যনৰ সভাপতি অজয় ভূষণ সৰকাৰৰ ঘোষণা, বাঙালী যুৱ ছাত্ৰ ফেডাৰেশ্যনৰ নামত ৰাজনৈতিক দল গঠন কৰাটো সহ্য কৰা নহ'ব । ই এটা অৰাজনৈতিক সংগঠন আৰু সংগঠনে ৰাজনৈতিক দলৰ পোষকতা কৰা নাই আৰু নকৰে; ইয়াৰ বিৰুদ্ধে শীঘ্ৰেই আইনৰ দ্বাৰস্থ হ'ব সংগঠন ।
সদৌ অসম বাঙালী যুৱ-ছাত্ৰ ফেডাৰেশ্যন এটা অৰাজনৈতিক সংগঠন । এই সংগঠনে কোনো দিনে ৰাজনৈতিক দলৰ পোষকতা কৰা নাই আৰু ৰাজনৈতিক দল গঠন কৰাত পোষকতা নকৰে । ৰাজ্যত শেহতীয়াকৈ সদৌ অসম বাঙালী যুৱ ছাত্ৰ ফেডাৰেশ্যনৰ নেতৃত্বত ৰাজ্যত আৰু এক ৰাজনৈতিক দল গঠন কৰিব বুলি প্ৰচাৰ চলোৱাৰ কাৰ্যত প্ৰতিক্ৰিয়া প্ৰকাশ কৰিছে সদৌ অসম বাঙালী যুৱ-ছাত্ৰ ফেডাৰেশ্যনৰ সভাপতি অজয় ভূষণ সৰকাৰে । ইটিভি ভাৰত, অসমৰে হোৱা আছুতীয়া সাক্ষাৎকাৰত তেওঁ কয় যে সদৌ অসম বাঙালী যুৱ-ছাত্ৰ ফেডাৰেশ্যনে সদায় অৰাজনৈতিক চৰিত্ৰ অক্ষুন্ন ৰাখি আহিছে । এতিয়াও আছে আৰু ভবিষ্যতলৈও এইবোৰ আৰ্দশ দেখুৱাই যাব। বিশেষকৈ ৰাজ্যৰ ৰাজনৈতিক প্ৰেক্ষাপটত কেইজন মান তথাকথিত নেতাই সদৌ অসম বাঙালী যুৱ-ছাত্ৰ ফেডাৰেশ্যনৰ নাম লৈ অহা 10-11 ছেপ্টেম্বৰত শোণিতপুৰত গণ অভিৱৰ্তনৰ যোগেদি দিপক দে আৰু শ্যামল সৰকাৰৰ দৰে যি সকল স্বয়ম্ভূ নেতাই ৰাজনৈতিক দল খোলাৰ পোষকতা কৰিছে, সেইয়া বিৰোধিতা কৰিছে সদৌ অসম বাঙালী যুৱ ছাত্ৰ ফেডাৰেশ্যনে ।
বাঙালী যুৱ ছাত্ৰ ফেডাৰেশ্যনৰ নৱনিৰ্বাচিত সভাপতি অজয় ভূষণ সৰকাৰৰ অভিযোগ, নিৰ্বাচনৰ সময়ত ৰাজনৈতিক দলৰ পোষকতা কৰা এই দুই নেতাৰ চৰিত্ৰ অসমবাসী ৰাইজৈ বুজি পায়। সদ্য সমাপ্ত বাঙালী যুৱ -ছাত্ৰ ফেডাৰেশ্যনৰ কেন্দ্ৰীয় প্ৰতিনিধি সভাত ইয়াৰ বিৰুদ্ধে কঠোৰ স্থিতি গ্ৰহণ কৰি ইয়াক তীব্ৰ ভাষাৰে গৰিহণা আৰু নিন্দা কৰিছো । যি কেইজন স্বয়ম্ভূ বাঙালী নেতাই বাঙালী যুৱ-ছাত্ৰ ফেডাৰেশ্যনৰ নাম লৈ ৰাজ্যৰ বাঙালী সমাজখনত বিভাজিত কৰিব বিচাৰে তাক আমি সহজে নেৰো । এই কেৱলমাত্ৰ দুজনমান তথাকথিত লোকৰ স্বসিদ্ধি পূৰণৰ অভিস্পাৰ বাহিৰে আন একো নহয় ।
আনহাতে নৱ নিৰ্বাচিত সভাপতি গৰাকীয়ে কয় যে ৰাজনৈতিক দল খোলাৰ অধিকাৰ আছে; কিন্ত বাঙালী যুৱ ছাত্ৰ ফেডাৰেশনৰ নাম লৈ ৰাজনৈতিক দল খোলাৰ অধিকাৰ নাই । ইয়াৰ বিৰুদ্ধে আমি আইনৰ সাহাৰ্য্য লম বুলি সদৰী কৰে । মন কৰিবলগীয়া কথা যে, সদ্য সমাপ্ত ছাত্ৰ সংগঠনটোৰ পঞ্চদশ দ্বি-বাৰ্ষিক কেন্দ্ৰীয় অভিৱৰ্তনত ইয়াৰ বিৰুদ্ধে বিশদভাৱে আলোচনা কৰা হৈছে বুলি মন্তব্য কৰি সদৌ অসম বাঙালী যুৱ ছাত্ৰ ফেডাৰেশ্যনৰ নবনিৰ্বাচিত সভাপতি অজয় ভূষণ সৰকাৰে । লগতে কোকৰাঝাৰ জিলা বিজ্ঞান মহাবিদ্যালয়ৰ প্ৰেক্ষাগৃহত অনুষ্ঠিত হোৱা উক্ত প্ৰতিনিধি সভাত সকলোৰে সহায় সহযোগিতা আগবঢ়োৱাৰ বাবে ধন্যবাদ জ্ঞাপন কৰে ।
