মৰিগাঁও, 23 মাৰ্চ : মঙলবাৰৰ পৰা পবিতৰা অভয়াৰণ্যত আৰম্ভ হৈছে গঁড় গণনাৰ কাম । কাজিৰঙা ৰাষ্ট্ৰীয় উদ্যানৰ পাচতে ঘন বসতিপূৰ্ণ এটা খড়্গ যুক্ত গঁড়ৰ বাবে বিখ্যাত পবিতৰা অভয়াৰণ্য । প্ৰতি বছৰে অভয়াৰণ্যখনৰ বিভিন্ন পশু পক্ষীৰ সমান্তৰালকৈ পৃথিৱী বিখ্যাত এটা খড়্গ যুক্ত গঁড়ৰ গণনা কৰি অহা হৈছে ।
2022 বৰ্ষৰ পবিতৰা অভয়াৰণ্যত গঁড়ৰ গণনা প্ৰক্ৰিয়া মঙলবাৰে পুৱাৰ পৰা আৰম্ভ কৰে মৰিগাঁও বন বিভাগে (One horned rhino census 2022 of Pobitora Wildlife Sanctuary)। দুদিনীয়া কাৰ্যসূচীৰে মুঠ ৭ টা ব্লকত এই গণনা কাৰ্য সমাপন কৰা হয় । অভয়াৰণ্যখনৰ সম্পূৰ্ণ ৭ টা ব্লকত হাতীৰ সহযোগত গঁড় গণনা কাৰ্য আৰম্ভ কৰিছে বন বিভাগে ।
তথ্য অনুসৰি, ২০১৮ চনত গণনাকাৰী দলে অভয়াৰণ্যখনত গণনা কৰি পাইছিল মুঠ ১০২ টা গঁড় ৷ বুধবাৰৰ দিনটো সম্পূৰ্ণ গণনা কৰাৰ অন্ততহে অভয়াৰণ্যখনত কিমান গঁড় আছে, তাৰে সঠিক তথ্য প্ৰকাশ কৰিব বন বিভাগে । ইফালে দুদিনীয়া কাৰ্যসূচীৰ অন্তত সোমবৰে ওৰাং ৰাষ্ট্ৰীয় উদ্যানত ২০২২ বৰ্ষৰ গড় গণনাৰ কাম সম্পূৰ্ণ (Rhino census of Orang National Park) কৰা হয় ৷
তথ্য অনুসৰি, চলিত বৰ্ষত উদ্যানখনত বৃদ্ধি পাইছে ২৪ টাকৈ গঁড় (Rhino Population Increases at Orang National Park) । ইয়াৰ পূৰ্বে উদ্যানখনত আছিলে ১০১ টা গঁড় । কিন্তু এইবাৰ গণনাত পোৱা গ'ল মুঠ ১২৫ টা গঁড় ৷ মঙলদৈ বন সংমণ্ডল বিষয়া প্ৰদীপ্ত বৰুৱাই সোমবাৰে জনাই এই কথা ।
সেই অনুসৰি, উদ্যানখনত আছে মুঠ ৪৩ টা মতা গঁড়, ৪৯ টা মাইকী গঁড়, ২৩ টা পোৱালি গঁড় আৰু মতা মাইকী নিৰ্ণয় কৰিব নোৱাৰা গঁড়ৰ সংখ্যা হৈছে ১০ টা । ব্ৰহ্মপুত্ৰৰ উত্তৰ পাৰৰ দৰং আৰু শোণিতপুৰ জিলাৰ ৭৮.৮১ বৰ্গ কি:মি: সামৰি থকা উদ্যানখনত ২৪ টাকৈ গঁড়ৰ বৃদ্ধিয়ে সম্প্ৰতি আশাৰ বতৰা কঢ়িয়াই আনিছে ।
লগতে পঢ়ক : ওৰাং ৰাষ্ট্ৰীয় উদ্যানত ২০২২ বৰ্ষৰ গড় গণনা সম্পূৰ্ণ
