মৰিগাঁও, 26 ছেপ্টেম্বৰ : সোমবাৰে মৰিগাঁও জিলা সাহিত্য সভাৰ অন্যতম বাচনাঘাট শতদল শাখা সাহিত্য সভাৰ দ্বিতীয় বাৰ্ষিক প্ৰতিষ্ঠা দিৱস পালন কৰা হয় ৷ প্ৰতিষ্ঠা দিৱসৰ লগতে সংগতি ৰাখি অনুষ্ঠিত হয় বিশেষ সভা ৷ সভাত উপস্থিত আছিল অসম সাহিত্য সভাৰ প্ৰধান সম্পাদক ড৹ উপেন্দ্ৰজিৎ শৰ্মা ৷ অতি উলহ-মালহেৰে অনুষ্ঠিত কৰা হয় মৰিগাঁও জিলা সাহিত্য সভাৰ বাচনাঘাট শতদল শাখা সাহিত্য সভাৰ দ্বিতীয় বাৰ্ষিক প্ৰতিষ্ঠা দিৱস ৷
উক্ত সভাতে অসম সাহিত্য সভাই বাচনাঘাট শাখা সাহিত্য সভাক ‘শতদল’ শাখাৰ স্বীকৃতি পত্ৰ প্ৰদান কৰে ৷ অসম সাহিত্য সভাৰ প্ৰধান সম্পাদক ড৹ উপেন্দ্ৰজিৎ শৰ্মাই এই স্বীকৃতি প্ৰদান কৰি উল্লেখ্য কৰে যে, যুৱ প্ৰজন্মক সাহিত্যৰ প্ৰতি আকৰ্ষণ আৰু অনুপ্ৰেৰণাৰ বাবে এই স্বীকৃতি প্ৰদান কৰা হৈছে ৷
বৰ্তমান সাহিত্য সভাই লোৱা কিছু পদক্ষেপৰ কথা উল্লেখ কৰি তেওঁ সাংবাদিকৰ আগত কয়, ‘‘ৰীতি-নীতি, পৰম্পৰা ধৰি ৰাখি আমাৰ জাতীয় জীৱনলৈ অহা প্ৰত্যাহবানসমূহক নেওচি আমি অসম সাহিত্য সভাক শক্তিশালী কৰিব লাগিব ৷ ভাল কাম এটা কৰিবলৈ হ’লে প্ৰত্যাহ্বান আহিবই ৷ সেয়ে আমি সততা, নীতি আদৰ্শৰে আগবাঢ়িব লাগিব ৷ অসমৰ প্ৰতিটো ভাষা, সাহিত্যক আদৰি আমি আগবাঢ়ি যোৱাৰ প্ৰয়াস কৰিছো ৷’’
আনহাতে, বাৰপূজীয়াত হ’ব লগা আগন্তু সাহিত্য সভাৰ অধিৱেশনৰ সন্দৰ্ভত তেওঁ কয়, ‘‘আমি প্ৰতিটো পদক্ষেপতে বাৰপূজীয়া ৰাইজৰ মতামত লৈছো ৷ আমি সতাত আৰু আদৰ্শ লৈ আগবাঢ়িব বিচাৰিছো ৷ বাৰপূজীয়া অধিৱেশনৰ পৰা যাতে আমাৰ জাতীয় জীৱনৰ আন এক মাত্ৰা প্ৰদান কৰিব পাৰে তাৰ বাবে চেষ্টা কৰি আছো ৷ সকলো জাতি জনগোষ্ঠীয়ে এক মন, এক পণ, এক ভাবেৰে জাতীয় জীৱনক আগবঢ়াই নিয়াৰ প্ৰয়াস কৰিব লাগিব আৰু এয়াই হ’ব আমাৰ বাৰপূজীয়া অধিৱেশনৰ মূল মন্ত্ৰ ৷ আমি ডিজিটেল মাধ্যমটো সাহিত্য চৰ্চা কৰা আৰম্ভ কৰিছে ৷ ’’
