মৰিগাঁও, 18 অক্টোবৰঃ মৰিগাঁৱৰ এখন গাঁৱত নাই কাতি বিহুৰ উছাহ ৷ আদৰৰ বিহুটি পাতিবলৈ একাংশ লোকৰ নাই এডোখৰ ঠাই ৷ মৰিগাঁওৰ পলাশগুৰিত এইবাৰ মৰিশালীৰ নিস্তব্ধতা । শোকত ভাগি পৰিছে গাঁওখনৰ মুনিহ তিৰোতা সকলো । চাৰিওফালে নিমাওমাও পৰিৱেশ৷ শস্য মস্যৰে নদন বদন অঞ্চলটোত এতিয়া একোৱেই নাই ৷ ভৰ বাৰিষা কাল ৰূপ ধৰি অহা লুইতৰ কোবাল সোঁতত উটি গ'ল সকলো ৷ কোনমতে মানুহকেইটা বাচিল যদিও লুইতৰ বুকুত জাহ গ'ল ভঁৰাল ঘৰ,চোতাল,ভেটি মাটি সকলো৷ প্ৰায় 74 টা পৰিয়ালৰ ঘৰ বাৰী লুইতে গ্ৰাস কৰাৰ পিচত তেওঁলোকৰ ঠিকনা এতিয়া পথৰ দাতি অথবা মথাউৰি ৷ শৰণাৰ্থীৰ দৰে জীৱন নিৰ্বাহ কৰিছে তেওঁলোকে৷ এইয়াই জীৱন তেওঁলোকৰ বাবে ৷ আদৰৰ বিহুটি পাতিবলৈ তেওঁলোকৰ নিজৰ বুলিবলৈ নাই এখন চোতলা কিম্বা খেতি পথাৰ৷ যুগ যুগ ধৰি বাস কৰি অহা সাতামপুৰুষীয়া ভেটিটো হেৰুৱাই বিহুৰ দিনা ফেঁকুৰি উঠিল তেওঁলোক ৷ মৰিগাঁৱৰ লাহৰীঘাটৰ পলাশগুৰি গাঁৱত এতিয়া বিষাদৰ বন্যা৷ নাই কাতি বিহুৰ উছাহ ৷ সময়ৰ পৰিৱৰ্তনত সকলো হেৰুৱাই উদাস মনেৰে চাই ৰৈছে লুইতৰ বুকুত জাহ যোৱা ভেটিটোলৈ ৷
আনহাতে এতিয়াও গাঁও খনৰ ওচৰৰ এটা ৰিং বান্ধত বাস কৰা বহুকেইটা পৰিয়ালৰ সাতামপুৰুষীয়া ঘৰ ভেটি সকলে লুইতৰ বুকুত জাহ যায় বিগত বাৰিষাত ৷ ঘৰবাৰী, মাটি, ভেটি হেৰুৱাই তেওঁলোক এতিয়া অঘৰী ৷ বিহুৰ দিনা ক্ৰন্দনত ফাঁটি পৰিল অঞ্চলটোৰ লোকসকল ৷
