মৰিগাঁও,25ছেপ্টেম্বৰ: ৰাজ্যত কৰ'ণা ভাইৰাছৰ আতংক চলি থকাৰ মাজতেই বৃহস্পতিবাৰে মৰিগাঁৱত উন্মোচন কৰা হয় তিনিখনকৈ গ্ৰন্থ ৷ আনন্দৰাম ঢেকীয়াল ফুকনৰ ওপজা দিৱসৰ লগত সংগতি ৰাখি উন্মোচন কৰা হয় গ্ৰন্থকেইখন ৷ ক'ভিড প্ৰট'কল মানি জিলাখনৰ সাংবাদিক সন্থাৰ সভাগৃহত অনুষ্ঠিত হোৱা সভাখনত পৌৰহিত্য কৰে মৰিগাঁও জিলাৰ সাংবাদিক সন্থাৰ প্ৰাক্তন সভাপতি বিৰিঞ্চি কুমাৰ শৰ্মাই ।
জিলাখনৰ আগশাৰী সাহিত্যানুষ্ঠান জ্ঞানমঞ্জৰী আলোচনা চক্ৰ , শব্দকল্প আৰু কামৰূপ জিলাৰ ৰামপুৰৰ পৰাগজ্যোতি প্ৰকাশনৰ যুটীয়া সহযোগত আয়োজন কৰা হয় এই গ্ৰন্থ উন্মোচন সভা । মৰিগাঁও মহাবিদ্যালয়ৰ অধ্যক্ষ ডঃ লীলাকান্ত বৰঠাকুৰৰ কবিতাপুথি 'আকাশ তিৰবিৰাই হৃদয়ত' উন্মোচন কৰে বিশিষ্ট কবি- সাহিত্যিক তথা জিলাখনৰ আৰক্ষী বিষয়া ডঃ নন্দ সিং বৰকলাই ৷ সাহিত্যকৰ্মী তথা স্বাস্থ্যবিভাগৰ কৰ্মচাৰী জ্যোতিষ বৰ্মনৰ প্ৰৱন্ধ সংকলন 'প্ৰজ্ঞাৰ সন্ধানত' মৰিগাঁও জিলা সাহিত্য সভাৰ সভাপতি প্ৰতাপ হাজৰিকাই আৰু কবিতাপুথি 'ডাক পখিলী' উন্মোচন কৰে মৰিগাঁও জিলা সাহিত্য সভাৰ প্ৰাক্তন সভাপতি হৰেন্দ্ৰ বৰাই ।
গ্ৰন্থ উন্মোচনী সভাত আৰক্ষী অধীক্ষক ডঃ বৰকলাই হৃদয় অনুভূতিৰে সংপৃক্ত কবিতা ৰসোতীৰ্ণ হয় বুলি মন্তব্য কৰি ভাল লেখা সমূহে সাহিত্যিক সমৃদ্ধ কৰে আৰু বেয়া লেখাই পংগু কৰে বুলি মন্তব্য কৰে ।
অন্য এক খবৰৰ বাবে: ৰাজ্যত কৰ'ণা ভাইৰাছে প্ৰাণ ল’লে 608 গৰাকীৰ
