পৰম্পৰাগতভাৱে আৰম্ভ হ'ল ব'ল বম

ভগৱান শিৱক আৰাধানা কৰাৰ উদ্দেশ্যে শাওণ মাহত ব'ল বম পালন কৰে ভক্তসকলে ৷ শাওণ মাহৰ প্ৰাথমটো পূৰ্ণিমাৰ দিনা মহানগৰীৰ বশিষ্ঠ আশ্ৰমতো এমাহ জোৰা কাৰ্যসূচীৰে আয়োজন কৰা হয় ব'লবম। পৰম্পৰা আছে যে শাওন মাহত দেৱাদিদেৱ মহাদেৱৰ জন্ম মাহ । মহাদেৱৰ জন্ম মাহতে হিন্দু পৰম্পৰা অনুযায়ী আয়োজন কৰা হয় এই ব'লবমৰ ।

মৰিগাঁও,জুলাই 22 : শাওণ মাহ আৰম্ভ হোৱাৰ লগে লগে আৰম্ভ হয় ব'লবম ৷ ভগৱান শিৱক আৰাধানা কৰাৰ উদ্দেশ্যে শাওণ মাহত ব'লবম পালন কৰে ভক্তসকলে ৷ গেৰুৱা বসন পৰিধান কৰি শিৱ বন্দনাৰে দূৰণিৰ ঘাটৰ পৰা পানী আনি ভক্তসকলে শাওণৰ প্ৰতিটো সোমবাৰে পুৱা শিৱ লিংগত ঢালি পূজা-অৰ্চনা কৰে ৷ দেৱাদিদেৱ মহাদেৱৰ চৰণ শৰণ লৈ ভক্তসকলে মনোবাঞ্চা পূৰণৰ হকে সেৱা আগবঢ়োৱ দেখা যায় ৷

দেশৰ ভিন্ন প্ৰান্তৰ লগতে মৰিগাঁও জিলাতো দেখা গৈছে ব'লবমৰ ব্যস্ততা ৷ বানে মৰিগাঁৱতো প্ৰভাৱিত কৰিছে যদিও তাৰ মাজতেই অধিৰ উচাহেৰে ওলাই আহিছে ভক্তসকল ৷ বস্ত্ৰ বিপণী সমূহো ভৰি পৰিছে ব'লবম বাবে বিশেষভাৱে নিৰ্মিত মহাদেৱৰ ছবি সম্বলিত পেণ্ট,কামিজ,মোনা,আদিৰে ৷ কোনোৱে যদি জঁটা পিন্ধি জঁটাধাৰীৰ ৰূপ লৈছে কোনোৱে আকৌ ব'লবমৰ গীতৰ তালে তালে নৃত্য কৰি মতলীয়া হৈ পৰিছে ৷ বিভিন্ন বাহনেৰে মৰিগাঁৱৰ সাত গাঁৱৰ যুৱকসকলে জাগীৰোড নিজৰা পাৰৰ পৰা পানী তুলি শিৱ মন্দিৰত পূজা আগবঢ়াই ৷ ইয়াৰ লগতে ভক্তসকলে ব'লবমৰ নামত যাতে কোনেও উশৃংখলতাৰ সৃষ্টি নকৰে তাৰ বাবে আহ্বান জনাই ৷

আনহাতে,শাওণ মাহৰ প্ৰাথমটো পূৰ্ণিমাৰ দিনা মহানগৰীৰ বশিষ্ঠ আশ্ৰমতো এমাহ জোৰা কাৰ্যসূচীৰে আয়োজন কৰা হয় ব'লবম । পৰম্পৰা আছে যে শাওন মাহত দেৱাদিদেৱ মহাদেৱৰ জন্ম মাহ । মহাদেৱৰ জন্ম মাহতে হিন্দু পৰম্পৰা অনুযায়ী আয়োজন কৰা হয় এই ব'লবমৰ। এইবাৰ ব'লবমত কোনো ভক্তপ্ৰাণ ৰাইজে বশিষ্ঠ মন্দিৰ প্ৰাংগণত সেৱন কৰিব নোৱাৰিব নিচাজাতীয় পদাৰ্থ । লগতে প্লাষ্টিক মুক্ত ব'লবম পালন কৰা হব এইবাৰ বশিষ্ঠ মন্দিৰ প্ৰাংগণত।