মৰিগাঁও,21 চেপ্তেম্বৰ: পুষ্টিহীনতা দুৰ কৰাৰ উদ্দেশ্যে প্ৰতিবছৰে চেপ্তেম্বৰ মাহটোক পালন কৰা হয় পোষণ মাহ হিচাপে ৷ তাৰ বাবে চৰকাৰে গ্ৰহণ কৰিছে কেতবোৰ বিশেষ আঁচনি । এই কাৰ্যসূচীৰ অংশৰূপে মৰিগাঁও জিলা সমাজ কল্যাণ বিভাগৰ উদ্যোগত সোমবাৰে পালন কৰা হৈছে পোষণ অভিযানৰ এলানি কাৰ্যসূচী ৷
জিলাখনৰ শুখনাগোগত 407 নং অংগনবাদী কেন্দ্ৰটো আদৰ্শ কেন্দ্ৰৰূপে সোমবাৰে মুকলি কৰে সমষ্টিটোৰ বিধায়ক ৰমাকান্ত দেউৰী আৰু জিলা উপায়ুক্ত লীনা দাসে ৷ কেন্দ্ৰটোৰ ফিটা কাটি বিধায়ক আৰু জিলা উপায়ুক্তগৰাকীয়ে পোষণ মাহ উপলক্ষে প্ৰস্তুত কৰা বিভিন্ন আহাৰৰ জুতি লৈ উপস্থিত ৰাইজৰ মাজত ফল-মূলৰ বীজ বিতৰণ কৰে ৷
এই কাৰ্যসূচীৰ লগত সংগতি ৰাখি বিগত লক ডাউনৰ সময়ছোৱাত সেৱা আগবঢ়োৱা অংগনবাদী কৰ্মী অনামিকা চক্ৰৱৰ্তীক সম্বৰ্ধনা জ্ঞাপন কৰে জিলা উপায়ুক্তই ৷ তদুপৰি জিলা উপায়ুক্তগৰাকীয়ে অংগনবাদী কেন্দ্ৰসমূহৰ কৰ্মী,সহায়িকা আৰু আশা কৰ্মীসকলৰ সহযোগত স্বাস্থ্য সজাগতা বৃদ্ধি আৰু পুষ্টিৰ বাবে ল’বলগীয়া যতন সমূহৰ বিষয়ে উল্লেখ কৰি ধন্যবাদ জ্ঞাপন কৰে ।
লগতে চাওকঃ নগাঁৱৰ ঔদ্যোগিক প্ৰশিক্ষণ প্ৰতিষ্ঠানৰ 9 গৰাকী শিক্ষাৰ্থীৰ দেহত COVID-19
