মৰিগাঁও, 19 নৱেম্বৰ: জোনবিল সন্দৰ্ভত জাগীৰোডৰ বিধায়ক তথা অসম চৰকাৰৰ মন্ত্ৰী পীযুষ হাজৰিকাই কৰা এটা মন্তব্যক লৈ ৰাজ্যৰ ৰাজনীতিত সৃষ্টি হৈছে তীব্ৰ প্ৰতিক্ৰিয়া ৷ ইয়াৰ মাজতে নিজৰ মন্তব্য সন্দৰ্ভত স্পষ্টীকৰণ দিছে বিধায়ক গৰাকীয়ে ৷ "মই জোনবিলৰ কথাহে কৈছিলো, জোনবিল মেলাৰ বিষয়ো কোৱা নাই আৰু কোৱাৰ ধৃষ্টতাও নাই" বুলি স্পষ্ট কৰিছে মন্ত্ৰী গৰাকীয়ে ৷ ইয়াৰ ওপৰিও যদি জোনবিল মেলাৰ অস্তিত্ব নাই বুলি কোৱাৰ কথা কোনোবাই প্ৰমাণ কৰিব পাৰে তেনেহলে ৰাজনীতি ত্যাগ কৰিম বুলিও মন্তব্য কৰিছে মন্ত্ৰী গৰাকীয়ে ৷
আনহাতে আমাৰ সাংবাদিকৰ আগত মন্ত্ৰী গৰাকীয়ে কয় যে, "জোনবিলখন সংকোচিত হৈ লাহে লাহে নোহোৱা হৈ গৈ আছে আৰু কিছুদিনৰ পিছত জোনবিল খনৰ অস্তিত্বই নোহোৱা হ'ব ৷ গতিকে আমি জোনবিলক উদ্ধাৰ কৰিব লাগে ৷ জোনবিল মেলাৰ অস্তিত্ব নাই বুলি মই কোৱা নাই আৰু নকওঁ ৷ মোৰ কোৱাৰ ধৃষ্টতাও নাই ৷ বোধ হয় মইয়ে একমাত্ৰ বিধায়ক যি জনে মুখ্যমন্ত্ৰীক প্ৰতিবছৰে ইয়ালৈ আনিছো "৷ "জোনবিল উন্নয়নৰ বাবে এক কোটি টকা চৰকাৰৰ ফালৰ পৰা দিয়া হৈছে আৰু ব্যক্তিগত ভাৱে সহায় সহযোগিতা কৰি আছো আৰু অধিক কৰিবলৈও আগ্ৰহী ৷ এই বিতৰ্ক তিলটোকে তালটো কৰা একাংশ লোকৰ বাবে হৈছে ৷ মই এই শ্ৰেণীৰ মানুহক ভয় নকৰোঁ ৷" মই চিধা চিধিকৈ সঁচা কথাবোৰ কৈ দিওঁ তাতে একাংশ মানুহে বেয়া পায় । তেওঁ লোকক চেলেঞ্জ কৰি পুনৰ নিৰ্বাচনত জয়ী হৈ আহিম বুলি মন্তব্য কৰে মন্ত্ৰী পীযুষ হাজৰিকাই ৷
উল্লেখ্য যে, বিগত 12 নৱেম্বৰত জাগীৰোডৰ বিধায়ক তথা ৰাজ্যিক মন্ত্ৰী পীয়ূষ হাজৰিকাই জোনবিল মেলাস্থলীৰ পাৰত থকা ডালমিয়া চিমেন্ট কোম্পানীটোৰ স্থাপন কৰাৰ প্ৰসংগত বক্তব্য আগবঢ়াই কৈছিল, জোনবিলৰ অস্তিত্ব নায় । ঐতিহাসিক জোনবিলৰ কোনো অস্তিত্ব নাই বুলি মন্ত্ৰী পীয়ূষ হাজৰিকাই কৰা মন্তব্যৰ পাচতে তীব্ৰ প্ৰতিক্ৰিয়া ব্যক্ত কৰিছিল জোনবিল পৰিচালনা সমিতিয়ে ৷ মন্ত্ৰীগৰাকীক নিজৰ স্থিতি স্পষ্ট কৰিবলৈ আহ্বান জনাইছিল সমিতিৰ সদস্য সকলে ৷ সমিতিৰ সভাপতি জুৰচিং বৰদলৈ প্ৰমুখ্যে সমিতিৰ একাংশ বিষয় ববীয়াই ইটিভি ভাৰতক জনাই যে, মন্ত্ৰী হাজৰিকাই এই মন্তব্য কিয় কৰিছে তেওঁলোকে বুজিব পৰা নাই ৷
লগতে পঢ়কঃ মন্ত্ৰী পীয়ূষ হাজৰিকাক শীঘ্ৰেই স্থিতি স্পষ্ট কৰাৰ আহ্বান জোনবিল মেলা সমিতিৰ
