মৰিগাঁও, 23 ডিচেম্বৰঃ ৰাজ্যৰ বিভিন্ন প্ৰান্তৰৰ লগতে মৰিগাঁৱতো অব্যাহত আছে CAA বিৰোধী আন্দোলন । সোমবাৰে মৰিগাঁও জিলা পবিতৰা হাট প্ৰেক্ষাগৃহৰ প্ৰাংগণত অনুষ্ঠিত হোৱা এক প্ৰতিবাদী কাৰ্যসূচীত চিপি আই আৰু ইয়াৰ ভাতৃ সংগঠনৰ প্ৰতিবাদকাৰীয়ে শীঘ্ৰে CAA প্ৰত্যাহাৰৰ বাবে দাবী জনাই ।
সোমবাৰে ৰাজ্যৰ বিভিন্ন প্ৰান্তৰ লগতে মৰিগাঁৱতো বাওপন্থী দল চি পি আইৰ উদ্যোগত আৰু একাধিক ভাতৃ সংগঠনৰ সহযোগত সংশোধিত নাগৰিকত্ব আইনৰ বিৰুদ্ধে অবস্থান ধৰ্মঘট কাৰ্যসূচী ৰূপায়ন কৰা হয় ৷ মৰিগাঁও জিলা পবিতৰা হাট প্ৰেক্ষাগৃহৰ প্ৰাংগণত অনুষ্ঠিত হোৱা এই প্ৰতিবাদী কাৰ্যসূচীত বাওপন্থী নেতা-কৰ্মী সকলে চৰকাৰ বিৰোধী বিভিন্ন শ্লগান আৰু বেনাৰ লৈ উদাত্ত কণ্ঠৰে ভাষণ আগবঢ়ায় ৷ চিপি আইৰ মৰিগাঁও জিলা পৰিষদৰ সম্পাদক ডম্বৰুধৰ দাসে আঁতধৰা এই গণ ধৰ্ণা কাৰ্যসূচীত প্ৰাক্তন বিধায়ক তথা চিপি আইৰ কেন্দ্ৰীয় নেতা মুনিন মহন্তই বক্তব্য আগবঢ়াই ৷
ইপিনে পাহাৰীয়া জিলা কাৰ্বিআংলঙৰ সদৰ চহৰ ডিফুত ছাত্ৰ সমাজ আৰু সংগ্ৰামী ৰাইজে CAA বাতিলৰ দাবীত সোমবাৰে অৱস্থান ধৰ্ণা আৰু বাটৰ নাট প্ৰদৰ্শন কৰে ৷ পোন প্ৰথমে প্ৰতিবাদকাৰী সকলে ডিফু ছেমছনছিং ইংতি মেম'ৰিয়েল পাৰ্কত জেষ্ঠ নাগৰিকৰ সৈতে অৱস্থান ধৰ্ণা কাৰ্যসূচী ৰূপায়ণ কৰে ৷ পৰৱৰ্তী সময়ত তেওঁলোকে সংশোধিত আইন খনৰ বিৰুদ্ধে প্ৰতিবাদকাৰী সকলক দেশ প্ৰেমেৰে উদ্বুদ্ধ কৰিবলৈ ডিফু চহৰৰ বাৰোৱাৰী দুৰ্গা মন্দিৰ আৰু হনুমান মন্দিৰৰ ওচৰত ' লবিতা আৰু লাচিত ' শীৰ্ষক বাটৰ নাট প্ৰদৰ্শন কৰি জনজাগৰণৰ সৃষ্টি কৰে ৷
লগতে পঢ়ক - গান্ধীৰ প্ৰতিমূৰ্তিৰ তলত বহি প্ৰফুল্ল কুমাৰ মহন্তৰ প্ৰতিবাদ
