নিউজ ডেস্ক, 27 অক্টোবৰঃ সমগ্ৰ দেশৰ লগতে অসমতো পোহৰৰ উৎসৱ দীপাৱলীৰ উদযাপনৰ ব্যাপক আয়োজন ৷ আনহাতে দীপাৱলীৰ সমান্তৰালকৈ ৰাজ্যৰ বিভিন্ন প্ৰান্তত চলিছে কালীপূজাৰ পূৰ্ণ প্ৰস্তুতি ৷ ধুবুৰীত দীপাৱলী আৰু কালীপূজাৰ ব্যাপক আয়োজন ৷ দীপাৱলী উপলক্ষে বজাৰতো দেখা গৈছে ব্যাপক ভিৰ ৷ ধুবুৰীৰ "আমৰা কজন" ক্লাৱে সাতদিনীয়াকৈ আয়োজন কৰিছে কালীপূজা ৷ পৰিৱেশ সংৰক্ষণ আৰু পানী সংৰক্ষণৰ আৰ্হি হিচাপে লৈ বিশেষ উদ্যানৰ মণ্ডপ নিৰ্মাণ কৰি এক সজাগতামূলক ইতিবাচক বাৰ্তা ৰাইজৰ মাজলৈ দিয়াৰ প্ৰয়াস কৰিছে ৷
ইফালে বৰপেটাতো দীপাৱলীৰ লগতে আয়োজনৰ প্ৰস্তুতি চলাইছে কালীপূজাৰো ৷ বৰপেটাৰ সৰুক্ষেত্ৰীৰ গহিয়াত এইবাৰ 61 সংখ্যক কালীপূজাৰ আয়োজন কৰা হৈছে ৷ ইয়াৰ লগত সংগতি ৰাখি বিভিন্ন কাৰ্যক্ৰমণিকাৰ আয়োজন কৰা দেখা গৈছে ৷
অন্যহাতে কলিয়াবৰতো এক ব্যতিক্ৰমী প্ৰয়াসেৰে দীপাৱলী আয়োজিত কৰাৰ যোজা চলাইছে ৷ কলিয়াবৰৰ সত্যদ্বীপা ফাউণ্ডেচনে কলিয়াবৰ মহকুমা প্ৰশাসনৰ সহযোগত এখন চিত্ৰাংকন প্ৰতিযোগিতা আৰু সেউজ দীপাৱলীৰ আয়োজনেৰে এক সজাগতামুলক কাৰ্যসূচী গ্ৰহণ কৰিছে ৷ সত্যদ্বীপা ফাউণ্ডেচনৰ উদীয়মান চিত্ৰ আৰু ভাস্কৰ্য শিল্পী ৰুদ্ৰ অংকুৰ হাজৰিকাই সুৰক্ষিত আৰু সেউজ দীপাৱলীৰ প্ৰয়োজনীয়তা আৰু এখন প্ৰদুষণমুক্ত সেউজ পৃথিৱী গঢ় দিয়াৰ উদ্দেশ্য দাঙি ধৰে ৷
আৰক্ষী আয়ুক্ত দীপক কুমাৰৰ দেৱালী উদযাপনৰ এক অনবদ্য পদক্ষেপ ৷ তেওঁ গুৱাহাটীৰ বিভিন্ন ঠাইৰ বৃদ্ধাশ্ৰম, অনাথ আশ্ৰমৰ পৰা আৰম্ভ কৰি নিচামুক্ত কেন্দ্ৰলৈ গৈ মিঠাই, চাকি আৰু কম প্ৰাৱল্যৰ ফটকা বিতৰণ কৰি এক অনন্য প্ৰয়াসেৰে আয়োজন কৰিছে দেৱালীৰ ৷ আৰক্ষী আয়ুক্ত গৰাকীয়ে সমগ্ৰ অসমবাসীক দেৱালীৰ শুভেচ্ছা জনায় আৰু প্ৰশাসনে দিয়া নিয়মাৱলীৰ ভিতৰত দেৱালীৰ আনন্দ ল’বলৈ অনুৰোধ কৰে ৷
আনহাতে মৰিগাঁৱত দীপাৱলী উপলক্ষে মানৱতাৰ অনন্য নিদৰ্শন ৷ যেন ফলিয়াই গ’ল ডঃ ভূপেন হাজৰিকাৰ কালজয়ী গীত ফাঁকি "মানুহে মানুহৰ বাবে যদিহে অকনো নাভাবে অকনি সহানুভুতিৰে ভাবিব কোনেনো কোৱা সমনীয়া" ৷ মৰিগাঁও চহৰৰ অনন্য নামৰ এক স্বেচ্ছাসেৱী সংস্থাৰ কেইজনমান মানৱদৰদী লোকে চহৰখনৰ পদপথত বসবাস কৰা তথা মানসিকভাৱে দুৰ্বল লোকসকলক খাদ্য, বস্ত্ৰ তথা ফল-মূলৰ বিতৰণেৰে কিছু ভাৱবিনিময় কৰি সেইসকলৰ মূখত হাঁহি বিৰিঙাই তোলাৰ প্ৰয়াস কৰে ৷ মৰিগাঁও মহাবিদ্যালয়ৰ প্ৰৱক্তা ডঃ হিমাংশু শৰ্মা, ডঃ শাৰদশ্ৰী চৌধুৰী শৰ্মা, সমাজ সেৱক তথা মৰিগাঁও জিলা কবি সন্মিলনৰ সভাপতি আশোক ডেকা, শিক্ষয়িত্ৰী তথা কৃষ্ণকান্ত সন্দিকৈ মুক্ত বিশ্ববিদ্যালয়ৰ গণমাধ্যম বিভাগৰ ফেকাল্টি দেৱযানী মহন্ত আৰু গাণণিক বিষয়া কবিতা বৰদলৈ এই প্ৰশংসনীয় পদক্ষেপ ৷ এই পদক্ষেপে দীপাৱলীৰ পোহৰেৰে আলোকিত কৰি তুলিছে সেইসকলক ৷
আৰু পঢ়কঃ আতংক নহয়, দীপাৱলী হওক কেৱল পোহৰৰ উৎসৱ !
