মৰিগাঁও, ১৪ মে': ৰাজ্যৰ আন আন জিলাৰ লগতে মৰিগাঁৱতো বৃদ্ধি পাইছে দৈনিক কৰ'ণাত আক্ৰান্তৰ সংখ্যা । সংক্ৰমণ ৰোধৰ বাবে প্ৰশাসনে জিলাখনৰ কেইবাটাও অঞ্চলক কন্টেইনমেন্ট জ'ন ঘোষণা কৰিছে । বৃহস্পতিবাৰে জিলাখনৰ চামকাটা গাঁৱক জিলা প্ৰশাসনে মাইক্ৰ' কন্টেইনমেন্ট জ'ন হিচাপে ঘোষণা কৰে ।
মৰিগাঁও জিলা দুৰ্যোগ প্ৰশমন ব্যৱস্থাপনা বিভাগৰ অধ্যক্ষা সীমাৰেখা ভূঞাৰ হৈ অতিৰিক্ত উপায়ুক্ত হানিফ নুৰানিৰ স্বাক্ষৰিত এক নিৰ্দেশনাৰ জৰিয়তে মৰিগাঁও ৰাজহ চক্ৰৰ চামকাটা গাঁৱক মাইক্ৰ' কন্টেইনমেন্ট জ'ন ঘোষণা কৰা হয় । গাঁওখনৰ মুঠ ৫৭ পৰিয়ালৰ ভিতৰত ২২টা পৰিয়ালৰে অৰ্ধ শতাধিক লোকৰ দেহত কৰ'ণা ভাইৰাছৰ অৱস্থিতি ধৰা পৰিছে ।
উত্তৰে- কাণপালা গাঁও, দক্ষিণে-চিকাবড়ী, পূৱে-ৰলী পথাৰ, পশ্চিমে-চামকাটা পথাৰলৈ যাতে সংক্ৰমণ বিয়পি নপৰে, তাৰ প্ৰতি লক্ষ্য ৰাখি গাঁওখনক মাইক্ৰ' কন্টেইনমেন্ট জ'ন ঘোষণা কৰে জিলা প্ৰশাসনে । আনহাতে, মৰিগাঁৱত ক'ভিড পৰিস্থিতি জটিল হৈ পৰিছে ।
বৃহস্পতিবাৰে জিলা স্বাস্থ্য বিভাগৰ উদ্যোগত মুঠ ১৫৬৯ গৰাকী লোকৰ ক'ভিড এন্টিজেন পৰীক্ষা কৰোৱা হয় । ইয়াৰে ১৯৭ গৰাকীৰ দেহত ধৰা পৰে কৰ'ণা ভাইৰাছৰ অৱস্থিতি । মৰিগাঁৱত বৃহস্পতিবাৰৰ দিনটোত মুঠ চাৰিগৰাকী কৰ'ণা আক্ৰান্তৰ মৃত্যু হয় ।
জিলা স্বাস্থ্য বিভাগে জনোৱা মতে, বৰ্তমানলৈকে জিলাখনত মৃত্যু হোৱা লোকৰ সংখ্যা ১০ জনলৈ বৃদ্ধি হৈছে । ইফালে, জিলাখনৰ মুঠ ১,১১৭ গৰাকী লোকক ক'ভিড মুক্ত বুলি ঘোষণা কৰিছে জিলা স্বাস্থ্য বিভাগে ।
লগতে পঢ়ক:বিহালীত কোৱাৰেণ্টাইনত থকা পৰিয়ালক ৰঞ্জিত দত্তৰ নিৰ্দেশত খাদ্যৰ যোগান
