মাজুলী, 18 জুলাই: শনিবাৰে মাজুলীত উপস্থিত হয় মাজুলীৰ (MAJULI) অভিভাৱক মন্ত্ৰী বিমল বৰা (BIMOL BORAH )। মাজুলীত উপস্থিত হৈয়ে মন্ত্ৰী গৰাকীয়ে কেইবাটাও আঁচনিত অংশগ্ৰহণ কৰে ৷ মাজুলীত উপস্থিত হৈ মন্ত্ৰীগৰাকীয়ে কয়, "ক'ভিড মহামাৰীত (COVID-19) আপোনজনক হেৰুৱাটো অতি বেদনাদায়ক আমাৰ সকলোৰে বাবে ৷ সেই বাবেই অসম চৰকাৰে আনিছে এক বিশেষ আঁচনি ৷ এই কঠিন পৰিস্থিতিৰ সন্মুখীন হোৱাৰ বাবে ৰাজ্য চৰকাৰে মুখ্যমন্ত্ৰী ক'ভিড-১৯ (covid-19) বিধৱা সাহাৰ্য আঁচনি আনিছে ।"
উল্লেখযোগ্য যে, মহামাৰী ক'ভিডত স্বামীহাৰা হোৱা মহিলা সকলৰ মৰ্মবেদনা উপলব্ধি কৰি তেখেতসকলৰ সামাজিক আৰু আর্থিক নিৰাপত্তা প্রদানৰ স্বাৰ্থত মুকলি কৰা "মুখ্যমন্ত্ৰী ক'ভিড-১৯ বিধৱা সাহাৰ্য আঁচনি" খনৰ যোগেদি সেই সকল মহিলালৈ ২.৫০ লাখ টকাৰ এককালীন সাহাৰ্য প্ৰদানৰ ব্যৱস্থা কৰিছে ৰাজ্য চৰকাৰে । সেই অনুসৰি শনিবাৰে মাজুলী জিলা উপায়ুক্তৰ সভাকক্ষত আয়োজিত এক অনুষ্ঠানৰ জৰিয়তে মাজুলী জিলাৰ অভিভাৱক মন্ত্ৰী বিমল বৰাই মুখ্যমন্ত্রীৰ সাহাৰ্য পুঁজিৰ অধীনত জিলাখনৰ 4 গৰাকী বিধৱা মহিলালৈ এককালীন সাহাৰ্য আগবঢ়ায় ৷
মন্ত্ৰী বিমল বৰাৰ পৰা অনুদান গ্ৰহণ কৰি আৱেগিক হৈ পৰে হিতাধিকাৰী মহিলা সকল । উল্লেখযোগ্য যে, বিৰ্তকৰ চৰ্চাত থকা যোৰহাট-মাজুলী দলঙখন হ‘বই বুলি মাজুলীবাসীক অভয়বানীও প্ৰদান কৰে মন্ত্ৰী গৰাকীয়ে ।
একেদৰে মাজুলীত হ‘ব লগীয়া উপ-নিৰ্বাচনৰ প্ৰসংগত মন্ত্ৰী গৰাকীয়ে সদৰি কৰে যে, ক‘ভিড পৰিস্থিতি উন্নত হলেই নিৰ্বাচন অনুস্থিত হ‘ব । মাজুলী বিধায়ক শূণ্য হ’লেও এতিয়াও মই অভিভাৱক মন্ত্ৰী হৈ আছো বুলি উল্লেখ কৰে বিমল বৰাই ৷ এনেদৰেই শনিবাৰে ৰাজ্যৰ বিভিন্ন প্ৰান্তত ৰাজ্য চৰকাৰৰ মন্ত্ৰীসকলে মুখ্যমন্ত্ৰী ক'ভিড-১৯ (covid-19) বিধৱা সাহাৰ্য আঁচনিৰ জৰিয়তে হিতাধিকাৰী সকলৰ মাজত ধন বিতৰণ কৰে ৷ বৰপেটাত ৰণজিৎ কুমাৰ দাস, গোলাঘাটত মুখ্যমন্ত্ৰী হিমন্ত বিশ্ব শৰ্মাই এই আঁচনিৰ জৰিয়তে একোগৰাকী হিতাধিকাৰীলৈ 2.50 লাখ টকাৰ আৰ্থিক সাহাৰ্য প্ৰদান কৰা দেখা যায় ৷
লগতে পঢ়কঃ বাজেটে মোৰ নাক বচালে: ৰণজিৎ দাস
