মাজুলীত ছেল্ফী উঠিবলৈ মন গ’ল বিধায়ক ৰূপজ্যোতি কুৰ্মীৰ !

মৰিয়নীৰ বিধায়ক ৰূপজ্যোতি কুৰ্মীয়ে বিজেপি চৰকাৰে কৈ অহা মাজুলীৰ উন্নয়ন সম্পৰ্কে স্বচক্ষে প্ৰত্যক্ষ কৰিবলৈ দেওবাৰে উপস্থিত হয় নদী দ্বীপটোত ৷ বিধায়কগৰাকীৰ সৈতে এই কাৰ্যসূচীত উপস্থিত থাকে মাজুলী কংগ্ৰেছৰ দলীয় নেতা-কৰ্মীসকল ৷

মাজুলী,27 ডিচেম্বৰ : দেওবাৰে পুৱা মাজুলীত উপস্থিত হয় মৰিয়নী সমষ্টিৰ কংগ্ৰেছী বিধায়ক ৰূপজ্যোতি কুৰ্মী ৷ কুৰ্মীয়ে দেওবাৰে কমলাবাৰীৰ পৰা ফেৰীযোগে আহি উপস্থিত হয় নদী দ্বীপটোত ৷ বিধায়কগৰাকীয়ে মাজুলীৰ ব্যৱসায়িক কেন্দ্ৰস্থল কমলাবাৰী চাৰিআলিত সাংবাদিকসকলৰ সৈতে মত বিনিময় কৰে ৷

কুৰ্মীয়ে বিজেপি চৰকাৰে কৈ অহা মাজুলীৰ উন্নয়ন সম্পৰ্কে স্বচক্ষে প্ৰত্যক্ষ কৰিবলৈ মাজুলীত উপস্থিত হোৱাৰ কথা সংবাদ মাধ্যমৰ আগত প্ৰকাশ কৰে ৷ বিশেষকৈ ব্ৰহ্মপুত্ৰত থকা সুৰংগ, চি প্লেন, এক্সপেছ হাইৱে আৰু মাজুলী সংযোগী যোৰহাট দলং আদি প্ৰত্যক্ষ কৰিবলৈ অহা বুলি ৰূপজ্যোতি কুৰ্মীয়ে কটাক্ষ কৰে বিজেপি চৰকাৰক ৷ বিধায়কগৰাকীয়ে মাজুলী সংযোগী যোৰহাটৰ দলঙখনত ছেল্ফী উঠিবলৈ অহা বুলি কৈ দলঙখন নেদেখি দুঃখিত বুলি প্ৰকাশ কৰে ৷

ইয়াৰ পিছতে বিধায়কগৰাকীয়ে উপস্থিত জনসাধাৰণক এয়া বিজেপি চৰকাৰৰ নিৰ্বাচনী কেন্দ্ৰিক ললিপপ বুলি মন্তব্য প্ৰকাশ কৰে ৷ সেয়ে পৰৱৰ্তী নিৰ্বাচনত ৰাইজে কংগ্ৰেছ চৰকাৰক শাসনৰ গাদীত অধিষ্ঠিত কৰিলে বিজেপি চৰকাৰে দিয়া আধৰুৱা প্ৰতিশ্ৰুতিসমূহ পূৰ্ণ কৰিব বুলি বিধায়ক কুৰ্মীয়ে ঘোষণা কৰে ৷ বিধায়কগৰাকীৰ সৈতে এই কাৰ্যসূচীত উপস্থিত থাকে মাজুলী কংগ্ৰেছৰ দলীয় নেতা-কৰ্মীসকল ৷

লগতে চাওকঃ মা কামাখ্যাৰ আশিস ল'লে কেন্দ্ৰীয় গৃহমন্ত্ৰী অমিত শ্বাহে