মাজুলী, 25 আগষ্ট : নিভাঁজ খাদ্যৰ নামত আপুনি খাইছে কি ? দোকানৰ পৰা ক্ৰয় কৰা খাদ্যত কিমান আছে বিশুদ্ধতা ! সামগ্ৰী ক্ৰয় কৰোতে আপুনি চাইনে বাৰু বিশুদ্ধতাৰ পৰিমাণ ? যদি নাচায়, তেন্তে সাৱধান ৷ আপোনাৰ সৰলতাৰ সুযোগ ল’ব পাৰে বিক্ৰেতাই ৷ কিয়নো মাজুলীত পোহৰলৈ আহিছে এক ভয়ংকৰ তথ্য ৷
মাজুলীৰ এজন ব্যৱসায়ীয়ে দীৰ্ঘদিনে গ্ৰাহকক খাদ্যৰ নামত বিক্ৰী কৰিছে বৰবিহ ৷ প্ৰশাসন অথবা যোগান বিভাগৰ অজ্ঞাতে ম্যাদ উকলা সামগ্ৰী বিক্ৰীৰে জনস্বাস্থ্যৰ প্ৰতি ভাবুকি কঢ়িয়াই আনিছে কমলাবাৰী চাৰিআলিৰ সুশীল কুমাৰ নামৰ ব্যৱসায়ীগৰাকীয়ে ৷ বিগত কিছুমাহ ধৰি কৰি ধাৰাবাহিকভাৱে ব্যৱসায়ীজনে এই কাৰ্য সংঘটিত কৰি আহিছে ৷ কিন্তু মঙলবাৰে মঙল বেয়া আছিল ব্যৱসায়ীগৰাকীৰ ৷
মাজুলীৰ খাদ্য সুৰক্ষা বিভাগে লাভ কৰা এক গোচৰৰ ভিত্তিত সুশীল কুমাৰৰ ব্যৱসায়িক প্ৰতিষ্ঠানত অতৰ্কিতে অভিযান (Sudden Visit) চলায় ৷ এই অভিযানৰ কালচোৱাত জিলা প্ৰশাসনে সুশীল কুমাৰৰ দোকানৰ পৰা জব্দ কৰে ম্যাদ উকলা বহু সামগ্ৰী ৷ তাৰে ভিতৰত হৈছে আটা, চয়াবিন, চুজি, মুড়ি, আমূল গাখীৰকে ধৰি বহু অত্যাৱশ্যকীয় সামগ্ৰী ৷
লগতে পঢ়ক: চৰকাৰী চাউল নামত ৰাইজলৈ বৰবিহ !
ইয়াৰ উপৰিও ব্যৱসায়িক প্ৰতিষ্ঠানখনৰ পৰা উদ্ধাৰ কৰা হয় বৃহৎ পৰিমাণৰ লালীগুড় ৷ কিন্তু লালীগুড়ৰ বিপৰীতে সেয়া সাধাৰণ গুড় বুলিহে অভিহিত কৰিছে ব্যৱসায়ীগৰাকীয়ে ৷ এই ঘটনাৰ সন্দৰ্ভত মাজুলীৰ খাদ্য সুৰক্ষা বিভাগে আৰম্ভ কৰিছে তদন্ত ৷
মাজুলীৰ খাদ্য সুৰক্ষা বিভাগে প্ৰকাশ কৰা অনুসৰি, কিছুদিন পূৰ্বে সেই দোকানখনৰ পৰা এগৰাকী দণ্ডাধীশে ক্ৰয় কৰিছিল কিছু সামগ্ৰী ৷ সামগ্ৰী ক্ৰয়ৰ পাচতহে পোহৰলৈ আহে সমগ্ৰ ঘটনা ৷ তাৰ পাচতে দণ্ডাধীশগৰাকীৰ অভিযোগৰ ভিত্তিত খাদ্য সুৰক্ষা বিভাগে কমলাবাৰী চাৰিআলিৰ সুশীল কুমাৰৰ দোকানত চলায় অভিযান ৷ এই ঘটনাক কেন্দ্ৰ কৰি অঞ্চলটোত সৃষ্টি হৈছে তীব্ৰ চাঞ্চল্যৰ ৷ ম্যাদ উকলা সামগ্ৰী বিক্ৰীৰে জনস্বাস্থ্যৰ প্ৰতি ভাবুকি কঢ়িয়াই অনা অসাধু ব্যৱসায়ীসকলৰ বিৰুদ্ধে বিহিত ব্যৱস্থা গ্ৰহণ কৰিবলৈ প্ৰশাসনক অনুৰোধ জনাইছে স্থানীয় লোকে ৷
লগতে পঢ়ক: থলুৱা মাছৰ নামত আপুনি খাইছে বৰবিহ !
