বিহপুৰীয়া, 18 ডিচেম্বৰ : পথাৰ আৰু বজাৰ দখলৰ চিন্তাৰে স্বাৱলম্বীতাৰ নিদৰ্শন দাঙি ধৰিছে নাৰায়ণপুৰৰ এজন যুৱকে । যুৱক জনৰ নাম জান চাৰিঙীয়া । উচ্চ শিক্ষাৰে শিক্ষিত নাৰায়ণপুৰৰ ৰঙতিৰ যুৱকজনে চাকৰিৰ পাছত নৌদৌৰি কৃষিৰ সৈতে জড়িত হৈ পৰি বহিঃৰাজ্যৰ সামগ্ৰীৰে চলি থকা বজাৰখন দখল কৰাৰ চেষ্টা চলাইছে । সেই উদ্দেশ্যে আগত ৰাখিয়েই ২০০১ চনৰ পৰা একেৰাহে বৰ্তমানলৈকে সম্পূৰ্ণ জৈৱিক পদ্ধতিৰে বিভিন্ন ধৰণৰ খেতি কৰি আহিছে জান চাৰিঙীয়াই ।
এইবেলি প্রায় দহ বিঘা মাটিত উন্নতমানৰ কবি, বেঙেনা, বিলাহী, জলকীয়া, আলু আদি বিভিন্ন ধৰণৰ পাচলিৰ খেতি কৰিছে যুৱকজনে । পিতৃৰ আদৰ্শেৰে অনুপ্ৰাণিত যুৱ কৃষকজনে এই পৰ্যন্ত কৃষি বিভাগৰ পৰা কোনো ধৰণৰ সহায় লাভ কৰা নাই ৷ বছৰৰ প্ৰতিটো খেতিয়েই কৰা যুৱ কৃষকজনৰ ৰবি খেতি তলীৰ পৰা ইতিমধ্যে বজাৰত উলিয়াব পৰা হৈছে পাচলি । সম্পূৰ্ণ নিজা প্ৰচেষ্টাত গঢ়ি তোলা কৃষি ফাৰ্মখনৰ জৰিয়তে স্বাৱলম্বী হ’ব খোজা যুৱকজন এতিয়া বহুতৰ বাবে আদৰ্শস্বৰূপ হৈ পৰিছে ।
বৰ্তমান সকলো ধৰণৰ শাক-পাচলিৰ খেতিৰ যোগেদি নিজকে স্বাৱলম্বী কৰি তুলিব পৰাৰ লগতে নাৰায়ণপুৰৰ বজাৰখনো দখল কৰিছে যুৱকজনে ৷ নতুন প্ৰজন্মক কৃষি কৰ্মৰ প্ৰতি আকৰ্ষিত হৈ নিজৰ বজাৰ নিজেই দখল কৰি গৌৰৱান্বিত হ'বলৈ যুৱকজনে আহ্বান জনাইছে ৷
লগতে পঢ়ক : অসম কৃষি বিশ্ববিদ্যালয়ত সংযোজন এনচিচি
