নাওবৈচা, ১০ ফেব্ৰুৱাৰী: স্বাধীনতা ৭৩ বছৰ পাছতো উন্নয়নৰ নামত লখিমপুৰ জিলাৰ নাওবৈচাৰ চুমণি গাঁৱৰ মূল পথটো নিৰ্মাণ নহ'ল । বাৰে বাৰে আহ্বান জনোৱাৰ পিছতো গাঁওবাসীৰ সমস্যাৰ প্ৰতি গুৰুত্ব নিদিলে স্থানীয় বিধায়ক আৰু চৰকাৰে । অৱশেষত ৰাইজে হাতে-কামে লাগি মেৰামতি কৰিছে শিঙৰা গাঁও পঞ্চায়তৰ অন্তৰ্গত চুমণি গাঁৱৰ জৰাজীৰ্ণ পথটো। বছৰ-বছৰ ধৰি বিধ্বস্ত পথটোৰ বাবে হাৰাশাস্তি ভুগি আহিছিল স্থানীয় ৰাইজে ৷
এজাক বৰষুণতে পথটো যাতায়াতৰ বাবে অনুপযোগী হৈ পৰে ৷ কেৱল এয়াই নহয়, পথটোৰ জৰাজীৰ্ণ অৱস্থাৰ বাবে বহু লোক দুৰ্ঘটনাত পতিত হৈ আহত হ'বলগীয়া হৈছে । কিন্তু সমস্যাজৰ্জৰ অঞ্চলৰ কথা ভাৱিবলৈ আহৰি নাই বিধায়কৰ । উপায়হীন হৈ ৰাইজে নিজেই ওলাই আহিল পথ মেৰামতিৰ বাবে। এতিয়া গাঁঠিৰ ধন ভাঙি পথ মেৰামতি কৰিছে ৰাইজে । গাঁওখনৰ ৰাইজে মঙলবাৰে প্ৰতিটো পৰিয়ালৰ পৰা দান বৰঙণি সংগ্ৰহ কৰে ৷
ৰাইজৰ বৰঙণিৰ প্ৰায় ৩০ হাজাৰ টকা ব্যয় কৰি চেণ্ড-গ্ৰেভেলৰে পথটো মেৰামতি কৰে । নিৰ্বাচনৰ সময়ত ভোট খুজিবলৈ অহা জনপ্ৰতিনিধিয়ে নিৰ্বাচনত জয়ী হোৱাৰ পিছত ৰাইজৰ সমস্যাৰ প্ৰতি গুৰুত্ব নিদিয়াৰ বাবেই ৰাইজে দীৰ্ঘদিন ধৰি দুৰ্ভোগ ভুগিব লগীয়া হৈছে বুলি অভিযোগ তোলে গাঁওবাসীয়ে । অতি শীঘ্ৰে পথটো মেৰামতি কৰি যাতায়াতৰ সু-ব্যৱস্থা কৰি দিবলৈ স্থানীয় বিধায়ক ইমদাদুল হক চৌধুৰীৰ লগতে বিভাগীয় কৰ্তৃপক্ষক পুনৰ আহ্বান জনাইছে গাঁওবাসীয়ে ৷ অন্যথা সমাগত বিধানসভা নিৰ্বাচনত গাঁওখনলৈ ভোট ভিক্ষা কৰিবলৈ অহা প্ৰতিজন প্ৰাৰ্থীকে পহু খেদা দিব বুলিও ৰাইজে সকিয়াই দিয়ে ।
