বিহপুৰীয়া,22 এপ্ৰিল : ক'ৰণাৰ ভয়াৱহ সংক্ৰমণৰ প্ৰতি লক্ষ্য ৰাখি ৰাজ্য চৰকাৰে ভেকদিন প্ৰদানৰ ব্যৱস্থা গ্ৰহণ কৰিছে যদিও কোনো কোনো ঠাইত ভেকচিন প্ৰদানক লৈ ব্যাপক অনিয়মৰ সৃষ্টি হোৱাৰ অভিযোগ উত্থাপন হৈছে ৷ শেহতীয়াভাৱে লখিমপুৰৰ নাৰায়ণপুৰৰ ধলপুৰ ব্লকৰ অন্তৰ্গত মহাত্মা গান্ধী আদৰ্শ চিকিৎসালয় আৰু ধলপুৰ খণ্ড প্ৰাথমিক ও সামূহিক চিকিৎসালয়কে ধৰি বিভিন্ন ঠাইত ভেকচিন প্ৰদানক লৈ ব্যাপক খেলি-মেলি হোৱাৰ অভিযোগ উত্থাপন কৰিছে একাংশ ৰাইজে ৷
ৰাইজৰ অভিযোগ অনুসৰি, ভেকচিন গ্ৰহণৰ বাবে নিজৰ নাম তালিকাভুক্ত কৰাৰ পাচতো একাংশ লোকে ভেকচিন লাভৰ পৰা বঞ্চিত হ'বলগীয়া হয় ৷ কাৰণ তালিকাত শেষৰ ফালে নাম অন্তৰ্ভুক্ত কৰা একাংশ লোকক স্বাস্থ্য কৰ্মীয়ে আগতীয়াকৈ ভেকচিন প্ৰদান কৰাৰ ফলতে বহু নিলগৰ পৰা অহা লোকসকল বঞ্চিত হোৱাৰ লগতে উভতি যাব লগীয়া হয় ৷
তদুপৰি, যিমান লোকক ভেকচিন গ্ৰহণৰ বাবে নিমন্ত্ৰণ জনোৱা হৈছিল তাৰ তুলনাত স্বাস্থ্য বিভাগে কম পৰিমাণৰ ভেকচিন প্ৰদান কৰাৰো অভিযোগ উত্থাপন হৈছে ৷ যাৰ ফলত নাৰায়ণপুৰত এক হাহাকাৰ পৰিস্থিতিৰ সৃষ্টি হয় ৷ ইফালে, এই সন্দৰ্ভত ধলপুৰ ব্লকৰ মহকুমা স্বাস্থ্য বিষয়াগৰাকীয়ে কোনো ধৰণৰ সমস্যা হোৱা নাই বুলি উল্লেখ কৰে যদিও ভেকচিন প্ৰদান আৰু গ্ৰহণৰ সময়ত কোনো ধৰণৰ সামাজিক দূৰত্ব মানি চলা পৰিলক্ষিত নহ'ল ৷
লগতে পঢ়ক: ধুবুৰী অসামৰিক চিকিৎসালয়ৰ নাৰ্চ-স্বাস্থ্য কৰ্মীৰ দেহত কৰ’ণা
