লখিমপুৰ, 9 নৱেম্বৰ : "বিজেপিৰ নেতা সকল পানী নোহোৱা পুখুৰীৰ মাছ ৷ পুখুৰীত পানী শুকাই গ’লে মাছে যি দৰে ছটফটাই থাকে বিজেপি নেতাৰো এতিয়া তেনে অৱস্থা ৷ জন সমৰ্থন নোহোৱা হৈ পৰাত বিজেপি নেতাই ছটফটাব ধৰিছে ৷ কংগ্ৰেছসহ বিৰোধী শিবিৰৰ শক্তিৰ উমান পাই তেওঁলোকে ভয় খাইছে ৷ সেয়েহে চৰকাৰী বাহিনী লগাই কংগ্ৰেছৰ কাৰ্যসূচী ব্যৰ্থ কৰাৰ প্ৰয়াস কৰিছে ৷" এই মন্তব্য প্ৰদেশ কংগ্ৰেছৰ কাৰ্যকৰী সভাপতি ৰাণা গোস্বামীৰ ৷
লখিমপুৰত বৃহস্পতিবাৰে যুৱ কংগ্ৰেছে আয়োজন কৰা এক পদযাত্ৰাত অংশগ্ৰহণ কৰি তেওঁ এই দৰে মন্তব্য কৰে ৷ উল্লেখ্য যে, যুৱ কংগ্ৰেছৰ এই পদযাত্ৰা কাৰ্যসূচীত অংশগ্ৰহণৰ বাবে জিলাখনৰ বিভিন্ন প্ৰান্তৰ পৰা কংগ্ৰেছ কৰ্মী সকল অহা যান-বাহন সমূহ আৰক্ষী, পৰিবহন বিভাগে বাটতে ৰখাই দিয়া বুলি অভিযোগ তুলি তেওঁ কয় যে, যান-বাহনৰ তালাচী চলোৱাত আপত্তি নাই ৷ কিন্তু আজিৰ দিনটোত তেওঁলোকৰ কাৰ্যসূচী ব্যৰ্থ কৰাৰ লক্ষ্যৰেহে চৌদিশে যান-বাহনৰ তালাচী চলাবলৈ আৰক্ষী, পৰিবহন বিভাগ জঁপিয়াই পৰে বুলি তেওঁ অভিযোগ তোলে ৷ ওপৰৰ নিৰ্দেশত জিলাখনত এনেদৰে কংগ্ৰেছৰ কাৰ্যসূচী ব্যৰ্থ কৰাৰ পাং পতা বুলিও তেওঁ ক্ষোভ প্ৰকাশ কৰে ৷
শাসকীয় দলে কৰবাত নহয় কৰবাত ভয় যে খাইছে সেইয়া ধুৰূপ বুলি উল্লেখ কৰি ৰাণা গোস্বামীয়ে কয় যে অসমত 13 টা বিৰোধী দলে মঞ্চ গঠন কৰিছে ৷ এই মঞ্চই উমৈহতীয়া এজেণ্ডাৰ জৰিয়তে ঘঁৰিয়ালৰূপী, অক্টোপাছৰূপী বিজেপিক পৰাস্ত কৰাত একেলগে কাম কৰিব ৷ বিজেপি দল তথা চৰকাৰক সমালোচনা কৰি তেওঁ কয় সম্প্ৰতি যুৱ সমাজ হতাশ হৈছে ৷ চৰকাৰে তেওঁলোকক বঞ্চনা কৰিছে ৷ যাৰ বাবে শেহতীয়াকৈ বিভিন্ন মহাবিদ্যালয়ৰ নিৰ্বাচন সমূহত কংগ্ৰেছৰ ভাতৃ সংগঠন এনএছইউআইৰ বিজয় হৈছে ৷ প্ৰতিশ্ৰুতি ভংগৰ বাবে শাসকীয় দলৰ প্ৰতি যুৱচামৰ অন্তৰত ক্ষোভৰ সৃষ্টি হৈছে ৷ নিয়োগৰ নামত তেওঁলোকক বঞ্চনা কৰা হৈছে বুলি কয় জ্যেষ্ঠ কংগ্ৰেছ নেতাগৰাকীয়ে ৷
লগতে তেওঁ কয় যে, লাখ লাখ চাকৰি দিম বুলি কোৱা চৰকাৰখনে এক লাখ চাকৰি দিবলৈও সক্ষম হোৱা নাই ৷ এতিয়ালৈকে যিখিনি নিযুক্তি দিলে সেইখিনি কৰ্মচাৰীৰ অৱসৰ অথবা মৃত্যু হোৱাৰ বাবে খালি হোৱা পদতহে নিযুক্তি দিছে ৷ নতুনকৈ এটা পদো সৃষ্টি কৰিব পৰা নাই চৰকাৰখনে ৷ নতুন পদ সৃষ্টি কৰি চৰকাৰখনে ঢাক-ঢোল বজালে ভাল আছিল বুলি তেওঁ চৰকাৰখনক কটাক্ষ কৰে ৷
উল্লেখ্য যে, লখিমপুৰ নগৰৰ খেলমাটিৰ শিৱমন্দিৰৰ সমীপত সমবেত হৈ কংগ্ৰেছ কৰ্মী সকলে নগৰৰ মাজেৰে পদযাত্ৰা কৰি জিলা কংগ্ৰেছৰ কাৰ্যালয়ত অন্ত পেলায় ৷ কাৰ্যসূচীত ৰাণা গোস্বামীৰ লগতে অসম প্ৰদেশ যুৱ কংগ্ৰেছৰ সভাপতি জুবেৰ আনম মজুমদাৰ, উপ-সভাপতি ডেভিড ফুকন, সম্পাদক সাগৰিকা বৰা, প্ৰত্যুষ দত্ত, প্ৰদেশ কংগ্ৰেছৰ মুখপাত্ৰ বৰ্ণালী ফুকন, সম্পাদক জিন্তু হাজৰিকা, জিলা কংগ্ৰেছৰ সভাপতি গগন বৰা, জিলা যুৱ কংগ্ৰেছৰ সভাপতি মৌচম লাহন,উপ-সভাপতি মৃদুল পেগু,সমষ্টি সমিতিৰ সভাপতি অনুপম শইকীয়া আদিয়ে অংশগ্ৰহণ কৰে ৷
লগতে পঢ়ক : Demands for tribalisation: নিৰ্বাচনৰ পূৰ্বে জনজাতিকৰণ নকৰিলে BJP নিষিদ্ধ কৰিব TAYPA ই
