গোঁসাইগাঁও,5 অক্টোবৰ: বিগত দুদিন ধৰি বন্যহস্তীৰ তাণ্ডৱৰ ফলত কোকৰাঝাৰৰ গোঁসাইগাঁও মহকুমাৰ সাপকাটা আৰক্ষী চকীৰ অন্তৰ্গত হাউৰিয়াপেট গাঁৱত ৰাইজৰ মাজত তীব্ৰ আতংক ৷ তিনিটা প্ৰকাণ্ড হাতীয়ে বাঁহনিৰ মাজত সোমাই তাণ্ডৱ চলায় ।
সোমবাৰে পুৱাৰ ভাগত হাতীৰ জাকটোৱে গাঁওখনত প্ৰৱেশ কৰা দেখি স্থানীয় ৰাইজে হাতী চাবলৈ ভিৰ কৰাত বন্যহস্তীৰ দলটোৱে ৰাইজলৈ খেদি আহে। ইয়াৰ পাচতে কচুগাঁও বন সংমণ্ডলৰ ৰেঞ্জাৰ তথা বিষয়া-কৰ্মীসকল ঘটনাস্থলীত উপস্থিত হয় যদিও হাতী খেদাবলৈ কোনো ব্যৱস্থা গ্ৰহণ নকৰা বুলি ৰাইজে অভিযোগ উত্থাপন কৰে ।
আনহাতে, ঘটনাস্থলীত বাতৰি সংগ্ৰহ কৰিবলৈ যোৱা সাংবাদিকৰ দল এটাই বাঁহনিৰ মাজত থকা হাতীৰ আলোকচিত্ৰ লৈ থাকোতে হাতী এটাই সাংবাদিককো লক্ষ্য কৰি চোঁচা লয় । হাতীৰ আক্ৰমণৰ পৰা বাচিবলৈ সাংবাদিকসকলে আঁতৰি যোৱাৰ সময়ত অগ্ৰদূত কাকতৰ সাংবাদিক স্বপন কুমাৰ এছে কাঁইটীয়া তাঁৰৰ ওপৰত বাগৰি পৰি আঘাতপ্ৰাপ্ত হয় ।
লগতে পঢ়ক: ৰাজ্যজুৰি অব্যাহত কংগ্ৰেছৰ তীব্ৰ প্ৰতিবাদ
