কোকৰাঝাৰ, 17 জুনঃ বিটিচি নিৰ্বাচনৰ দিন ঘোষণা কৰা নাই যদিও মহামাৰী কৰ'ণাৰ আতংকৰ মাজতো বড়ো ভূমিত বিটিচি নিৰ্বাচনী প্ৰচাৰ ঠায়ে ঠায়ে অব্যাহত ৰাখিছে বিভিন্ন দলে । ইপিনে এই প্ৰচাৰ অভিযানত মাস্ক পৰিধান নকৰাৰ লগতে সামাজিক দুৰত্ব মানি নচলাৰো অভিযোগ উত্থাপিত হৈছে । এই অভিযোগ কৰিয়েই উত্তৰ-পূৱ সংখ্যালঘু ছাত্ৰ সংস্থা চমুকৈ নেমছুয়ে বুধবাৰে আয়োজন কৰে এক সংবাদমেল ।
বুধবাৰে কোকৰাঝাৰ প্ৰেছ ক্লাবত আয়োজিত সংবাদমেলত উত্তৰ-পূৱ সংখ্যালঘু ছাত্ৰ সংস্থা চমুকৈ নেমছুৰ কেন্দ্ৰীয় সভাপতি বদৰুল ইছলামে কয় যে দেশত #unlock-1 হোৱাৰ পিছৰ পৰা বিটিচি নিৰ্বাচনক লৈ বিভিন্ন ৰাজনীতিক দলসমূহ উঠি পৰি লাগিছে । মহামাৰী ৰোগ ক'ৰণা ভাইৰাছ আতংকক নেওচি গাঁৱে গাঁৱে প্ৰচাৰ চলাবলৈ ধৰিছে ৰাজনীতিক দলসমূহে । কিন্তু এই প্ৰচাৰৰ সময় চোৱাত কোনো ৰাজনীতিক দল-সংগঠনে চৰকাৰে দিয়া নীতি নিয়ম যেনে মাস্ক পৰিধান আৰু সামাজিক দূৰত্ব বজাই ৰখা আদি নিয়মক মানি চলা নাই,যাৰবাবে অতি ভয়ংকৰ ৰূপ ল'ব পাৰে ক'ৰণা সংক্ৰমণে ।
আনহাতে ইয়াৰ ফলত অঞ্চলটোত ক'ৰণা সংক্ৰমণে ভয়ংকৰ ৰূপ ললে তাৰ বাবে ৰাজ্য নিৰ্বাচন আয়োগ জগৰীয়া হ'ব বুলি উল্লেখ কৰে সংগঠনটোৱে । উল্লেখ্য যে বিটিচি পৰিষদীয় নিৰ্বাচন যোৱা ৪ এপ্ৰিলত হোৱাৰ কথা আছিল যদিও মহামাৰী ক'ৰণা বাবে নিৰ্বাচন স্থগিত ৰাখিবলগা হৈছিল ৰাজ্যিক নিৰ্বাচন আয়োগে।
