কোকৰাঝাৰ, ২২আগষ্টঃ ভাৰত চৰকাৰৰ শিক্ষা আৰু সাহিত্য মন্ত্ৰালয়ে প্ৰদান কৰিছে ৰাষ্ট্ৰীয় কৃতি শিক্ষকৰ বঁটা- ২০২০ ৷ এই বঁটা লাভ কৰিবলৈ সক্ষম হৈছে কোকৰাঝাৰ চৰকাৰী বহুমুখী উচ্চতৰ মাধ্যমিক বিদ্যালয়ৰ শিক্ষক গৌতম দেৱ শৰ্মাই ৷ তেখেতৰ ঘৰ হ'ল চিৰাং জিলাৰ বাসুগাঁৱত ৷
উল্লেখ্য যে, এইবেলি ৰাষ্ট্ৰীয় কৃতি শিক্ষকৰ বঁটাৰ বাবে সমগ্ৰ দেশৰ ৩৬ খন ৰাজ্য আৰু ৭ খন কেন্দ্ৰীয় শাসিত অঞ্চলৰ পৰা মাত্ৰ ৪৭ গৰাকী শিক্ষকক ভাৰত চৰকাৰৰ শিক্ষা আৰু সাহিত্য মন্ত্ৰালয়ে এই বঁটা প্ৰদান কৰিব । তাৰে ভিতৰত অসমৰ পৰা একমাত্ৰ শিক্ষক গৌতম দেৱ শৰ্মাই ভাৰত চৰকাৰৰ শিক্ষা আৰু সাহিত্য মন্ত্ৰালয়ে প্ৰদান কৰা ৰাষ্ট্ৰীয় কৃতি শিক্ষকৰ বঁটা লাভ কৰিবলৈ সক্ষম হয় ৷ ইতিমধ্যে শিক্ষক গৌতম দেৱ শৰ্মাই এই বঁটা লাভ কৰি অসম তথা বিটিএডি লৈ সুনাম কঢ়িয়াই আনিবলৈ সক্ষম হৈছে ৷ কেন্দ্ৰীয় চৰকাৰে ৰাষ্ট্ৰীয় কৃতি শিক্ষকৰ বঁটাৰ বাবে নিৰ্বাচন কৰাৰ বাবে কেন্দ্ৰীয় চৰকাৰক ধন্যবাদ আৰু কৃতজ্ঞতা জনাইছে শিক্ষক গৌতম দেৱ শৰ্মাই ৷ অহা ৫ ছেপ্টেম্বৰৰ শিক্ষক দিৱসৰ দিনা ৰাষ্ট্ৰপতিয়ে এই বঁটা দিল্লীত প্ৰদান কৰিব বুলি জানিব পৰা গৈছে ৷
লগতে পঢ়ক-ৰাষ্ট্ৰীয় সন্মানেৰে পুৰস্কিত খুমটাইৰ কৃষক পল্লৱ গগৈ
