কোকৰাঝাৰ,9 এপ্ৰিলঃ অসমৰ সীমামুৰীয়া জিলা কোকৰাঝাৰৰ শ্ৰীৰামপুৰত থকা কোৱাৰেণ্টাইন গৃহত বৃহস্পতিবাৰে উপস্থিত হয় স্বাস্থ্য মন্ত্ৰী হিমন্ত বিশ্ব শৰ্মা । অসমৰ পৰা এমাহ পূৰ্বে বৈষ্ণোদেৱী, স্বৰ্ণমন্দিৰ, দিল্লী আদি স্থানলৈ তীৰ্থ ভ্ৰমণলৈ যোৱা ৪২ গৰাকী তীৰ্থযাত্ৰীৰ এটা দলে বিগত 15 দিনে শ্ৰীৰামপুৰৰ কোৱাৰেণ্টাইন গৃহত আছিল ৷ যাত্ৰীসকলৰ কোৱাৰেণ্টাইনৰ সময় উকলি যোৱাৰ বাবে খোদ স্বাস্থ্য মন্ত্ৰী গৰাকীয়ে উপস্থিত হৈ অনুমতি দিয়ে ঘৰলৈ উভটি যাবলৈ । উক্ত কাৰ্যসূচীত মন্ত্ৰী হিমন্তৰ লগত উপস্থিত থাকে ৰাজ্যিক স্বাস্থ্য মন্ত্ৰী পীযুষ হাজৰিকা, সাংসদ বিশ্বজিৎ দৈমাৰী, মন্ত্ৰী চন্দন ব্ৰহ্ম, বিটিচি প্ৰধান হাগ্ৰামা মহিলাৰী ৷ জিলাখনৰ সীমান্তৰ তিনি স্থানত আৱদ্ধ হৈ থকা প্ৰায় 400গৰাকী লোকক পৰ্যায়ক্ৰমে নিজ অঞ্চলত থকা কোৱাৰেণ্টাইন গৃহলৈ প্ৰেৰণ কৰা হ’ব ।
আনহাতে, নিজামুদ্দিনৰ পৰা অসমলৈ ঘুৰি অহা 15 জন লোক এতিয়াও নিৰুদ্দেশ হৈ আছে বুলি স্বাস্থ্য মন্ত্ৰী গৰাকীয়ে জনাইছে ৷ এই লোকসকলে বৰ্তমানলৈকে চৰকাৰ বা স্বাস্থ্য বিভাগৰ লগত যোগাযোগ কৰা নাই । যাৰ বাবে চিকিৎসক,নাৰ্ছ সকলৰ লগতে অন্যান্য লোকসকলক কোৱাৰেণ্টাইনত ৰাখিবলগীয়া হৈছে ৷
