গোসাইগাঁও, 17 চেপ্তেম্বৰঃ বিগত তিনি মাহ ধৰি জহি খহি পৰি ৰৈছে এখন পকী দলং । বন্ধ হৈছে গোসাইগাঁও-গৌৰীপুৰৰ যাতায়ত। কিন্তু গড়কাপ্তানি বিভাগ আৰু জন প্ৰতিনিধিয়ে এই ক্ষেত্ৰত কোনো ধৰণৰ ব্যৱস্থা নোলোৱাৰ অভিযোগ ৷ ডিংডিঙাৰ পৰা ৰূপচী বিমান বন্দৰ হৈ গৌৰীপুৰলৈ যোৱা গড়কাপ্তানি পথৰ খৰখৰি গাঁৱত থকা দলঙৰ দুৰৱস্থাই জীয়াতু ভোগাইছে স্থানীয় ৰাইজক । কোকৰাঝাৰ জিলাৰ বিটিচিৰ দুই নম্বৰ গুমা সমষ্টিৰ অন্তৰ্গত এই পকী দলংখন বিগত তিনি মাহ পূৰ্বে বানপানীত খহি পৰে । তেতিয়াৰ পৰাই ডিংডিঙা আৰু গৌৰীপুৰৰ যাতায়ত বন্ধ হৈ পৰে। ফলত বৃহত্তৰ এলেকা ডিংডিঙা, তামাৰহাট , হাতীধুৰা অঞ্চলৰ পৰা ৰোগী নিব পৰা নাই ধুবুৰী অসামৰিক চিকিৎসালয়লৈ । এই দলংখনৰ বাবেই যাতায়তৰ ক্ষেত্ৰত তীব্ৰ সমস্যাৰ সন্মুখীন হৈছে স্কুল কলেজৰ শিক্ষাৰ্থী সকল।
উক্ত খহি থকা পকী দলংখনে ব্যৱসায়, বাণিজ্য, শিক্ষা আদি সকলো দিশতে অঞ্চলটোত বাধাৰ সৃষ্টি কৰিছে। অঞ্চলটোৰ ৰাইজে স্থানীয় বিধায়ক, পৰিষদীয় সদস্য আৰু গড়কাপ্তানি বিভাগক কাকূতি-মিনতি কৰিও কোনো সুফল লাভ কৰা নাই। ফলত এক ভয়াবহ পৰিস্থিতিৰ মাজত নিতৌ যাতায়ত কৰিছে স্থানীয় ৰাইজে।
