কোকৰাঝাৰ,10 মাৰ্চ: ৰাজ্যৰ সমাগত বিধানসভা নিৰ্বাচনত কংগ্ৰেছ নেতৃত্বাধীন মহাজোঁটে কমেও 70 খন আসন পাব আৰু আগন্তুক চৰকাৰ মহাজোঁটে গঠন কৰিব বুলি দাবী বিপিএফৰ সভাপতি হাগ্ৰামা মহিলাৰীৰ ৷ উল্লেখ্য যে, মহাজোঁটৰ এক বৈঠকত অংশগ্ৰহণ কৰাৰ বাবে বুধবাৰে কোকৰাঝাৰৰ গ্ৰীণ ফিল্ডৰ হেলিপেডৰ পৰা হেলিকপ্তাৰযোগে বিপিএফৰ সভাপতি হাগ্ৰামা মহিলাৰীয়ে গুৱাহাটীলৈ উৰা মাৰে ৷
ইয়াৰ পূৰ্বে সংবাদ মাধ্যমৰ আগত হাগ্ৰামা মহিলাৰীয়ে দাবী কৰে যে, বিজেপিয়ে কেতিয়াও 100+ আসন নাপায় ৷ 27 মাৰ্চত অনুষ্ঠিত হ'বলগীয়া প্ৰথম পৰ্যায়ৰ নিৰ্বাচনত তেওঁ বিটিআৰৰ বাহিৰৰ হয়তো 18 টা সমষ্টিত মহাজোঁটৰ হৈ প্ৰচাৰ চলাব লাগিব বুলি মন্তব্য কৰে ।
বুধবাৰে গুৱাহাটীত অনুষ্ঠিত হ'বলগীয়া বৈঠকতে এই সকলো বিষয় ঠিক কৰা হ'ব বুলি উল্লেখ কৰি আগন্তুক চৰকাৰ মহাজোঁটে গঠন কৰাটো 100 শতাংশ নিশ্চিত বুলিও পুনৰাই দাবী কৰে হাগ্ৰামা মহিলাৰীয়ে । ইপিনে বিপিএফৰ দ্বিতীয় পৰ্যায়ৰ প্ৰাৰ্থীৰ তালিকাখন 12-15 মাৰ্চৰ ভিতৰত ঘোষণা কৰা হ'ব বুলি সংবাদ মাধ্যমৰ আগত সদৰী কৰে বিপিএফৰ সভাপতি হাগ্ৰামা মহিলাৰীয়ে ৷
লগতে পঢ়ক: পাঁচ বছৰত 50 শতাংশ সম্পত্তি বৃদ্ধি সোণোৱালৰ
