কোকৰাঝাৰ,15 ফেব্ৰুৱাৰী : সোমবাৰে চিআৰপিএফৰ 48 নং বেটেলিয়ানৰ উদ্যোগত কোকৰাঝাৰ চহৰৰ বুনিয়াদী প্ৰশিক্ষণ কেন্দ্ৰৰ চৌহদত স্কুলীয়া ছাত্ৰ-ছাত্ৰীৰ মাজত ৰূপায়ণ কৰা হয় এক জনকল্যাণমুখী কাৰ্যসূচী ৷ উক্ত কাৰ্যসূচীৰ জৰিয়তে কোকৰাঝাৰৰ বুনিয়াদী নিম্ন প্ৰাথমিক বিদ্যালয়ৰ ছাত্ৰ -ছাত্ৰীৰ মাজত ভলীবল আদিকে ধৰি বিভিন্ন ক্ৰীড়া সামগ্ৰী বিতৰণ কৰা হয় ৷
উল্লেখ্য যে, দেশৰ নিৰাপত্তাৰ হকে অহৰহ সেৱা আগবঢ়োৱা কেন্দ্ৰীয় অৰ্দ্ধসামৰিক বাহিনী চমুকৈ চিআৰপিএফে দেশবাসীৰ নিৰাপত্তাৰ উপৰিও ৰাইজৰ মাজত সু-সম্পৰ্ক গঢ় দিয়াৰ প্ৰয়াস কৰিছে ৷ সেই উদ্দেশ্যে চহৰ, গাঁৱে-ভূঞে বিভিন্ন জনকল্যাণ কাৰ্যসূচী গ্ৰহণ কৰি আহিছে চিআৰপিএফে ৷
ধুবুৰী জিলাৰ গৌৰীপুৰত থকা চিআৰপিএফ বাহিনীয়ে বিশেষকৈ বিদ্যালয়ৰ কণ-কণ ছাত্ৰ-ছাত্ৰীসকলৰ মাজত ক্ৰীড়াৰ যোগেদি শৰীৰৰ উৎকৰ্ষ মানসিক বিকাশ গঢ় দিয়াৰ উদ্দেশ্যে ছাত্ৰ-ছাত্ৰীসকলক ভলীবল, নেটকে ধৰি বিভিন্ন ক্ৰীড়া সামগ্ৰী বিতৰণ কৰে ৷
ইয়াৰোপৰি, চিআৰপিএফ জোৱানে বুনিয়াদী প্ৰশিক্ষণ কেন্দ্ৰৰ চৌহদৰ খেলপথাৰত খেলৰ উপযোগীকৈ ভলীবলৰ পিটছ এখনো তৈয়াৰ কৰি দিয়ে ৷ এই কাৰ্যসূচীত উপস্থিত থাকে বেটেলিয়ানটোৰ অধিনায়ক এছ এছ এইচ ৰিজৱী, উপ-অধিনায়ক মীৰ সিং, মীনা বুনিয়াদী নিম্ন প্ৰাথমিক বিদ্যালয়ৰ প্ৰধান শিক্ষক বিমল চন্দ্ৰ বসুমতাৰী, ছাত্ৰ-ছাত্ৰী, বুনিয়াদী প্ৰশিক্ষণ কেন্দ্ৰৰ শিক্ষক-শিক্ষয়িত্ৰীকে ধৰি বহু বিশিষ্ট ব্যক্তি ৷
লগতে পঢ়ক : চাহ শ্ৰমিকৰ মজুৰি বৃদ্ধিৰ ইংগিত বিধায়ক অশোক কুমাৰ সিংহীৰ
