কোকৰাঝাৰ, 8 জানুৱাৰী: ইউপিপিএল,বিজেপি আৰু গণ সুৰক্ষা পাৰ্টী মিত্ৰজোটৰ বিটিচি পৰিষদে দাখিল কৰিলে নিজৰ প্ৰথমখন বাজেট ৷ শুকুৰবাৰে অনুষ্ঠিত বাজেট অধিৱেশনত 1746 কোটি 46 লাখ 22 হাজাৰ টকাৰ বাজেট দাখিল কৰে পৰিষদে ৷ এই অধিৱেশনতে গৃহিতও কৰা হয় এই বাজেট ৷
সৰ্বমুঠ 39 টা বিভাগৰ বাবে ধাৰ্য কৰা হৈছে বাজেটৰ এই ধনৰাশি ৷ শিক্ষা,যাতায়াত গ্ৰামোন্নয়ন আদিত অধিত গুৰুত্ব দিয়া হ’ব বুলি মন্তব্য কৰে বিটিচি প্ৰধান প্ৰমোদ বড়োৱে ৷
আনহাতে,এই বাজেট অধিৱেশনৰ সময়ত সদনত উপস্থিত নাছিল বিপিএফৰ সদস্যসকল ৷ এই সন্দৰ্ভত বিটিচি প্ৰধান প্ৰমোদ বড়োৱে কয় যে,পিকনিক আদি সকলো বাদ দি সদস্য সকল সদনলৈ অহা উচিত ৷ পূৰ্বৰ বিটিচি চৰকাৰে 2300 কোটি টকাৰ বকেয়া আদায় দিবলৈ থকা সন্দৰ্ভত বিটিচি প্ৰধান গৰাকীয়ে এয়া নতুন চৰকাৰলৈ বিপিএফৰ উপহাৰ বুলি কটাক্ষ কৰে ৷
জানিব পৰা মতে,হাগ্ৰামা মহিলাৰীৰ অধীনৰ লোক নিৰ্মাণ(গড়কাপ্তানী) বিভাগতে অনাদায় হৈ আছে 1000 কোটি টকা ৷ ইয়াৰোপৰি চি ডি বিভাগত 350 কোটি টকাৰ বকেয়া অনাদায় হৈ আছে ৷ এই সকলো খেলিমেলিৰ ওপৰত বিভাগীয় তদন্ত হ’ব আৰু ভিজিলেঞ্চ অথবা প্ৰয়োজনত চিবিআইকো তদন্তৰ দায়িত্ব অৰ্পণ কৰা হ’ব বুলি জানিবলৈ দিয়ে প্ৰমোদ বড়োৱে ৷
লগতে পঢ়কঃ মাওবাদীৰে জড়িত থকাৰ বাবেহে কাৰাবন্দী হৈছে অখিল : হিমন্ত বিশ্ব শৰ্মা
