কোকৰাঝাৰ, 11 এপ্ৰিলঃ 5 নং লোকসভা সমষ্টি দখলৰ উদ্দেশ্যে প্ৰচাৰ অভিযান তীব্ৰতৰ কৰি তুলিছে ইউপিপিএল দলে ৷ বৃহস্পতিবাৰে মংগলদৈ লোকসভা সমষ্টিৰ প্ৰাৰ্থী উৰ্খাও গৌৰাৰ প্ৰচাৰ অভিযানত ইউ এম এম চিৰ সভাপতি ইউছুফ আলিয়ে কয় যে কোকৰাঝাৰত কেতিয়াও কংগ্ৰেছ জয়ী হ'ব নোৱাৰে লগতে বড়ো-অনবড়োৰ বিভাজনৰ ফলত এটা সময়ত হীৰা শৰণীয়া জয়ী হৈছিল যদিও সেই সময় আৰু নাই গতিকে উৰ্খাও গৌৰা ব্ৰহ্মৰ জয় নিশ্চিত ৷
আনহাতে গোসাইগাঁৱৰ শ্ৰীৰামপুৰ হাইস্কুল খেলপথাৰতো এখন সভা আহ্বান কৰি বঙালী যুৱ ছাত্ৰ ফেডাৰেচনৰ কেন্দ্ৰীয় সমিতিৰ উপদেষ্টা সুশীল দাসে উৰ্খাও গৌৰা ব্ৰহ্মৰ সপক্ষে প্ৰচাৰ অভিযান চলায় ৷ সভাত দাসে বিজেপি দলৰ বিৰুদ্ধে অভিযোগৰ আঙুলি টোৱাই কয় যে, বিজেপিয়ে সাতামপুৰুষীয়া অসমীয়া বঙালীৰ মাজত বৰ্তি থকা শান্তি সম্প্ৰীতি ভাতৃত্ববোধ বিনষ্ট কৰাৰ প্ৰয়াস কৰাৰ লগতে নাগৰিকত্ব সংশোধনী বিধায়কৰ নামত বঙালীক ভোট বেংক হিচাপে ব্যৱহাৰ কৰাৰ কৌশল ৰচিছে।
আনহাতে উক্ত সভাত মুখ্য অতিথি হিচাপে অংশগ্ৰহণ কৰি এবছুৰ সভাপতি প্ৰমোদ বড়োই তেওঁৰ বক্তব্যত কয় যে ,বিটিচি প্ৰধান হাগ্ৰামা মহিলাৰীয়ে বড়োলেণ্ড হ'লে অনা বড়ো সকল ইয়াতে থাকিব নোৱাৰিব বুলি মন্তব্য কৰে কাৰণ বড়ো-অবড়োৰ মাজত অবিশ্বাস সৃষ্টি কৰি ৰাজনীতিক মুনাফা লাভৰ অপচেষ্টা কৰিছে হাগ্ৰামা মহিলাৰীয়ে ৷
