কোকৰাঝাৰ, ২৩ মাৰ্চ: বিধানসভা নিৰ্বাচনৰ প্ৰাকক্ষণত অসমৰ বিভিন্ন ঠাইত উদ্ধাৰ হৈছে অস্ত্ৰ-শস্ত্ৰ । বাক্সা জিলাৰ পিছত এইবাৰ কোকৰাঝাৰ জিলাৰ ভাৰত-ভূটান সীমান্তৱৰ্তী বনাঞ্চলত উদ্ধাৰ হৈছে বৃহৎ পৰিমাণৰ অবৈধ অস্ত্ৰ-শস্ত্ৰ ৷
সোমবাৰে নিশা কোকৰাঝাৰ আৰক্ষী, চিআৰপিএফ আৰু এছএছবিৰ এটা অভিযানকাৰী দলে জিলাখনৰ গোসাইগাঁও মহকুমাৰ শৰাইবিল উপ আৰক্ষী চকীৰ অন্তৰ্গত বালুঝৰা বনাঞ্চলত অভিযান চলাই অবৈধ অস্ত্ৰ-শস্ত্ৰ খিনি উদ্ধাৰ কৰিবলৈ সক্ষম হয় ৷ উদ্ধাৰ কৰা অস্ত্ৰ-শস্ত্ৰৰ ভিতৰত আছে দুটা এ.কে-৫৬ ৰাইফল, ৯ এম এম পিষ্টল এটা, এ.কে-৫৬ ৰাইফলৰ মেগজিন দুটা, ৯ এম এম পিষ্টলৰ মেগজিন এটা আৰু ৪২ জাই সজীৱ গুলী ৷
মঙলবাৰে কোকৰাঝাৰ জিলা আৰক্ষী অধীক্ষকৰ কাৰ্যালয়ত এক সংবাদমেল সম্বোধন কৰি এই বিষয়ে সদৰি কৰে জিলা আৰক্ষী অধীক্ষক ৰাকেশ ৰোশ্বনে ৷ জিলা আৰক্ষী অধীক্ষক গৰাকীৰ মতে এক গোপন খবৰৰ ভিত্তিত সোমবাৰে নিশা ৭ মান বজাত কোকৰাঝাৰ আৰক্ষী, ১২৯ নং চিআৰপিএফ আৰু ৩১ নং এছএছবিৰ দলে জিলা খনৰ ভাৰত-ভূটান সীমান্তৱৰ্তী বালুঝৰা বনাঞ্চলত অভিযান চলোৱা হৈছিল ৷
কেইবাঘণ্টা ধৰি চলা অভিযানৰ অন্তত বনাঞ্চলটোৰে এঠাইত মাটিৰ তলত পুতি থোৱা অৱস্থাত অস্ত্ৰ-শস্ত্ৰ খিনি উদ্ধাৰ কৰিবলৈ সক্ষম হয় ৷ উক্ত অভিযানৰ নেতৃত্ব দিয়ে জিলা অতিৰিক্ত আৰক্ষী অধীক্ষক মুকুট ৰাভা আৰু উপ আৰক্ষী অধীক্ষক পুনমজিৎ নাথে ৷ ইফালে উদ্ধাৰ হোৱা অস্ত্ৰ-শস্ত্ৰখিনি কোনে, কি উদ্দেশ্যে মাটিত পুতি থৈছিল সেই সন্দৰ্ভত আৰক্ষীয়ে তদন্ত অব্যাহত ৰাখিছে ।
লগতে পঢ়ক:নিৰ্বাচনৰ প্ৰাকক্ষণত বাক্সাত উদ্ধাৰ মাৰণাস্ত্ৰ
