কোকৰাঝাৰ/14 এপ্ৰিল :- কোকৰাঝাৰ আৰক্ষী চকীত হাজিৰ অখিল গগৈ ৷ এবিএমছুৰ সভাত ৰাষ্ট্ৰ বিৰোধী মন্তব্য কৰাৰ অপৰাধত কৃষক নেতাগৰাকীৰ বিৰুদ্ধে উত্থাপিত হৈছিল অভিযোগ ৷
কোকৰাঝাৰ আৰক্ষীৰ এক গোচৰ নং 104/2019 ৰ ভিত্তিত দেওবাৰ অখিল গগৈ কোকৰাঝাৰ থানাত হাজিৰ হৈ তদন্তকাৰী বিষয়াৰ ওচৰত সাক্ষ্য প্ৰদান কৰে ।উল্লেখ্য যে যোৱা 24 মাৰ্চত কোকৰাঝাৰৰ ছালাকাটি অনুষ্ঠিত হোৱা এবিএমছুৰ সভাত অখিল গগৈয়ে ৰাষ্ট্ৰ বিৰোধী , জাতি - জনগোষ্ঠী বিৰোধী আৰু চৰকাৰ বিৰোধী বক্তব্য ৰখাৰ অভিযোগত অখিল গগৈৰ বিৰুদ্ধে কোকৰাঝাৰ আৰক্ষীয়ে তৰিছিল গোচৰ । উক্ত গোচৰৰ ভিত্তিত তথা গুৱাহাটী উচ্চ ন্যায়ালয়ৰ নিৰ্দেশমৰ্মে দেওবাৰে অখিল গগৈ কোকৰাঝাৰ সদৰ থানাত উপস্থিত হোৱাৰ পাচত তদন্তকাৰী বিষয়াই অখিল গগৈৰ বক্তব্য লিপিবদ্ধ কৰে ।
কোকৰাঝাৰ সদৰ থানাত এঘণ্টাৰো অধিক কাল সোধপোছৰ অন্তত সংবাদ মাধ্যমৰ আগত অখিল গগৈয়ে তেওঁৰ বিৰুদ্ধে তৰা গোচৰ সম্পূৰ্ণ ভুৱা আৰু ৰাজনৈতিক উদ্দেশ্য প্ৰণোদিত বুলি মন্তব্য কৰে ৷ কৃষক নেতা গৰাকীৰ মতে তেওঁ উক্ত সভাত কোনোধৰণৰ ৰাষ্ট্ৰ বিৰোধী , জাতি জনগোষ্ঠী বিৰোধী মন্তব্য প্ৰদান কৰা নাছিল । লাফিকুল ইছলাম হত্যাকাণ্ডৰ ন্যায় প্ৰদান আৰু বিজেপি চৰকাৰৰ বিৰুদ্ধেহে তেওঁ বক্তব্য ৰখা বুলি মন্তব্য কৰি বিজেপি চৰকাৰৰ বিৰুদ্ধে তেওঁ যাতে মাত মাতিব নোৱাৰে তাৰে এয়া এক কৌশল বুলি মন্তব্য কৰে ।
ইতিমধ্যে গুৱাহাটী উচ্চ ন্যায়ালয়ে গোচৰটোত জামিন প্ৰদান কৰাৰ কথা সদৰি কৰি অখিল গগৈয়ে এইবাৰ বিজেপিয়ে কেন্দ্ৰত চৰকাৰ গঠন কৰিব নোৱাৰে বুলি দাবী কৰে । আনহাতে হাগ্ৰামা মহিলাৰীৰ অৱস্থা এদিন লালু প্ৰসাদ যাদৱৰ দৰে হ'ব বুলিও তাৎপৰ্যপূৰ্ণ মন্তব্য কৰে অখিল গগৈয়ে ।
