কোকৰাঝাৰ, 17 জুলাই: লক ডাউনে নিম্নগামী কৰিছে দেশৰ অৰ্থনীতি ৷ ইয়াৰ ফলত বহু লোকে হেৰুৱাবলগীয়া হৈছে নিজৰ উপাৰ্জনৰ থল ৷ কিন্তু তাৰ মাজতে কিছু ব্যতিক্ৰম কোকৰাঝাৰ জিলাৰ গোঁসাইগাঁৱৰ মিকাছ মুছাহাৰী ৷ আৰ্থিক দীনতাৰ বাবে উচ্চ শিক্ষা গ্ৰহণ কৰিব নোৱাৰা যুৱক গৰাকীয়ে 2010 চনত আৰম্ভ কৰে কলৰ খেতি ৷
প্ৰথমে তিনি বিঘা,তাৰ পাচত 30 বিঘা আৰু তাৰ পৰৱৰ্তী সময়ত ক্ৰমান্বয়ে কোনো উৎপাদন নোহোৱাকৈয়ে নদীৰ পাৰত পৰি থকা প্ৰায় 300 বিঘা মাটিত কল খেতি কৰি, উপাৰ্জনৰ পথ প্ৰশস্ত কৰিছে যুৱকগৰাকীয়ে ৷ লক ডাউনৰ মাজতে মিকাছ মুছাহাৰীৰ খেতিৰ কলে ব্যাপক চাহিদা লাভ কৰিছে গুৱাহাটী, গোৱালপাৰা,ধুবুৰী,পশ্চিমবংগ আদিৰ বজাৰত৷ যুৱক গৰাকীয়ে উল্লেখ কৰা অনুসৰি,লক ডাউনৰ সময়ত তেওঁলোকে কল খেতিৰ পৰা উপাৰ্জন কৰিছে 1 কোটি টকা ৷
কেৱল ইমানেই নহয় সেই টকাৰে তেওঁ ক্ৰয় কৰিছে 14 লক্ষাধিক টকাৰ এখন বিলাসী বাহনো ৷ উল্লেখ্য যে,মিকাছে তেওঁৰ নিজৰ লগতে তেওঁৰ বন্ধু বীৰেণৰ সহযোগত দহ গৰাকীকৈ নিৱনুৱা যুৱকক প্ৰদান কৰিছে কৰ্মসংস্থাপন ৷ নিবনুৱা যুৱক-যুৱতীসকলৰ বাবে আদৰ্শস্বৰূপ মিকাছৰ মতে,ভাৰতত খেতি অবিহনে নাই অন্য গত্যন্তৰ ৷ যাৰ বাবে তেওঁ উঠি অহা যুৱ চামক আহ্বান জনায়,তেওঁলোকে যাতে ঘৰতে বহি নাথাকি বৰ্ধিত আয়সম্পন্ন খেতি কৰি নিজকে স্বাৱলম্বী কৰি তোলে ৷
