কোকৰাঝাৰ ১৪ ফেব্ৰুৱাৰী : অসমৰ দ্বিতীয় বৃহৎ সাহিত্যিক আৰু সাংস্কৃতিক অনুষ্ঠান হৈছে বড়ো সাহিত্য সভা (Bodo Sahitya Sabha) । বড়ো সাহিত্য-সংস্কৃতিৰ উন্নতি আৰু প্ৰসাৰৰ বাবে ১৯৫২ চনৰ ১৬ নৱেম্বৰত কোকৰাঝাৰ জিলাৰ বাসুগাঁৱত গঠন কৰা হৈছিল বড়ো সাহিত্য সভা । ইয়াৰ মুখ্য কাৰ্যালয় কোকৰাঝাৰত অৱস্থিত । এই অনুষ্ঠানটোত অসমৰ লগতে প্ৰতিৱেশী ৰাজ্য পশ্চিম বংগ, মেঘালয়, নাগালেণ্ড, ত্ৰিপুৰাৰ লগতে নেপালৰো প্ৰতিনিধিয়ে অংশগ্ৰহণ কৰে ।
প্ৰত্যেক বছৰে কোকৰাঝাৰত অনুষ্ঠিত হয় বড়ো সাহিত্য সভাৰ অধিবেশন ৷ এইবাৰো কোকৰাঝাৰ জিলাৰ পাটগাঁৱত অনুষ্ঠিত হ’ব বড়ো সাহিত্য সভাৰ ৬২ সংখ্যক কেন্দ্ৰীয় অধিবেশনখনি (62nd Bodo Sahitya Sabha session) ৷ অধিবেশনক লৈ ইতিমধ্যেই আৰম্ভ হৈছে ব্যাপক প্ৰস্তুতি ৷ পাটগাঁৱৰ সৰলভাঙা নৈ পাৰৰ ৰাণী খালাইশ্ৰীৰ বিশাল পথাৰত ২৩ ফেব্ৰুৱাৰীৰ পৰা চাৰিদিনীয়া বৰ্ণাঢ্য কাৰ্যসূচীৰে অনুষ্ঠিত হ’ব বড়ো সাহিত্য সভাৰ এই কেন্দ্ৰীয় অধিবেশনখন ৷
আয়োজক সমিতিয়ে জনোৱা মতে, অধিবেশনখনক লৈ দিনে নিশাই শ শ শ্ৰমিকে অব্যাহত ৰাখিছে প্ৰস্তুতিৰ কাম-কাজ (Bodo Sahitya Sabha Conference will held in Kokrajhar) ৷ অধিবেশনথলীত এক বিশাল পেণ্ডেল নিৰ্মাণৰ কাম চলি আছে, য’ত ৫০ হেজাৰৰো অধিক আসনৰ ব্যৱস্থা কৰা হ’ব ৷ অধিবেশনথলীতে বিশাল প্ৰদৰ্শনী আৰু গ্ৰন্থমেলাৰ পেণ্ডেলৰ কামো চলি আছে পূৰ্ণগতিত (Preparations underway for Bodo Sahitya Sabha) ৷
অধিবেশনৰ অভ্যৰ্থনা সমিতিৰ সভাপতি তথা বিধায়ক লৰেন্স ইছলাৰীয়ে জানিবলৈ দিয়া মতে পাঁচশটা বিপণীয়ে প্ৰদৰ্শনী আৰু গ্ৰন্থমেলাত অংশগ্ৰহণ কৰিব ৷ অধিবেশনত ৰাজ্যৰ ভিন্ন প্ৰান্তৰ পৰা আঢ়ৈ হেজাৰৰো অধিক প্ৰতিনিধিয়ে অংশগ্ৰহণ কৰিব ৷ ইয়াৰোপৰি পশ্চিম বংগ, ত্ৰিপুৰা, মণিপুৰসহ দেশৰ বিভিন্ন ৰাজ্যৰ উপৰিও বহিঃৰাষ্ট্ৰ নেপাল আৰু বাংলাদেশৰ পৰা বিশিষ্ট সাহিত্যিক আৰু বড়ো জনগোষ্ঠীৰ বিশিষ্ট ব্যক্তিয়ে অধিবেশনত অংশগ্ৰহণ কৰিব ৷
মুখ্যমন্ত্ৰী ড৹ হিমন্ত বিশ্ব শৰ্মাই অধিবেশনত অংশগ্ৰহণ কৰিব বুলি অভ্যৰ্থনা সমিতিৰ সভাপতি গৰাকীয়ে জানিবলৈ দিয়ে ৷ উল্লেখ্য যে, বড়ো সাহিত্য সভাৰ এই ৬২ সংখ্যক কেন্দ্ৰীয় অধিবেশনতে পুৰণি কমিটি ভংগ কৰি নতুন কেন্দ্ৰীয় সমিতি গঠন কৰা হ’ব ৷ ইপিনে অধিবেশনখনৰ প্ৰস্তুতিৰ কাম-কাজ সুচাৰুৰূপে তথা সাফল্যমণ্ডিত কৰিবলৈ মঙলবাৰে পাটগাঁৱত অভ্যৰ্থনা সমিতিৰ এক সভা অনুষ্ঠিত হয় ৷ সভাত অভ্যৰ্থনা সমিতিৰ সভাপতি তথা বিধায়ক লৰেন্স ইছলাৰী, সম্পাাদক জনীল ব্ৰহ্ম আৰু অভ্যৰ্থনা সমিতিৰ বিভিন্ন উপসমিতিসমূহে অংশগ্ৰহণ কৰে ৷
লগতে পঢ়ক: Digboi Press Club Poetry Conference: ডিগবৈ প্ৰেছ ক্লাৱত মাঘৰ এটি কবিতাৰ দিন শীৰ্ষক কবি সমাৰোহ
