কৰিমগঞ্জ, 12 ছেপ্তেম্বৰ: বিয়াৰ কেৱল 9 টা দিনৰ পাচতে ডিঙি ৰেপি নিজ পত্নীক হত্যা কৰিলে স্বামীয়ে ৷ এই ঘটনা সংঘটিত হৈছে কৰিমগঞ্জ জিলাৰ পাথাৰকান্দি সমষ্টিৰ মধুৰবন্দ গাঁৱত ৷ সাংবাদিকৰ কেমেৰাৰ আগত আকিব উদ্দিনে নামৰ লোক গৰাকীয়ে তেওঁৰ পত্নী আফছানা বেগমক হত্যা কৰাৰ কথা স্বীকাৰ কৰিলে নিজ মুখে ৷
শুকুৰবাৰে এক নিমন্ত্ৰণ ৰক্ষা কৰি শহুৰেকৰ ঘৰলৈ গৈছিল আকিব উদ্দিন ৷ নিশাৰ আহাৰ গ্ৰহণ কৰি দুয়ো শুবলৈ যায় ৷ কিন্তু নিশাই ঘটে অঘটন ৷ অভিযুক্ত স্বামীয়ে মিজ পত্নীক হত্যা কৰি, সেই হত্যাৰ অভিযোগ যাতে বেলেগলৈ উত্থাপিত হয় সেই উদ্দেশ্য ঘৰৰ বাহিৰত থৈ আহে মৃতদেহ ৷ কিন্তু শহুৰেকৰ পৰিয়ালৰ সন্দেহ হোৱাত সমগ্ৰ ঘটনা সন্দৰ্ভত তেওঁলোকে আৰক্ষীক জনোৱাৰ পাচতে ঘটনাস্থলীত আৰক্ষী উপস্থিত হৈ অভিযুক্ত আকিব উদ্দিনক আটক কৰি নিয়ে ৷ অৱশ্যে বৰ্তমানেও অভিযুক্তই পত্নীক হত্যা কৰাৰ কোনো গ্ৰহণযোগ্য কাৰণ দৰ্শোৱা নাই ৷ ঘটনা সন্দৰ্ভত তদন্ত অব্যাহত ৰাখিছে আৰক্ষীয়ে ৷
