কৰিমগঞ্জ, 27 আগষ্ট: বিজেপিৰ দখলত থকা কৰিমগঞ্জ জিলা পৰিষদৰ সভাপতিৰ বিৰুদ্ধে উত্থাপন হৈছে অনাস্থা প্ৰস্তাৱ ৷ জিলা পৰিষদখনৰ 9 গৰাকী সদস্যই সভাপতি গৰাকীৰ বিৰুদ্ধে আনিছে অনাস্থা প্ৰস্তাৱ ৷ জানিবপৰা মতে, বৰ্তমানৰ জিলা পৰিষদৰ সভাপতি গৰাকীৰ কাম-কাজত অসন্তুষ্ট হৈ 9 গৰাকী জিলা পৰিষদৰ সদস্যই স্বাক্ষৰ কৰি জিলা উপায়ুক্তক দাখিল কৰিছে অনাস্থা প্ৰস্তাৱ ৷
ইপিনে জিলা উপায়ুক্তৰ লগতে জিলা পৰিষদৰ মুখ্য কাৰ্যবাহী বিষয়াকো অনাস্থা প্ৰস্তাৱ দাখিল কৰিলে সভাপতিৰ বিৰুদ্ধে অনাস্থা অনা 9 গৰাকী সদস্যই ৷ জিলা উপায়ুক্তক অনাস্থা প্ৰস্তাৱ দাখিল কৰাৰ পাচতে জিলা পৰিষদখন ভংগ হোৱাতো স্পষ্ট হৈ পৰে ৷ কিয়নো কংগ্ৰেছ আৰু এআইইউডিফৰ 9 গৰাকী সদস্যৰ লগতে বিজেপিৰ আন চাৰিগৰাকী সদস্যও বৰ্তমান সভাপতি গৰাকীৰ বিৰুদ্ধে অসন্তুষ্ট হৈ পৰিছে ৷
লগতে পঢ়কঃ প্ৰথমে ধৰ্ষণ, তাৰ পিছত চোকা অস্ত্ৰৰে ডিঙি ৰেপি হত্যা কিশোৰীক
উল্লেখযোগ্য যে, সভাপতি গৰাকীৰ বিৰুদ্ধে আছে চীনা সামগ্ৰী ক্ৰয় কৰাৰ অভিযোগ ৷ ঘটনা অনুসৰি পঞ্চদশ বিত্তীয় আয়োগৰ প্ৰায় 25 লাখ টকাৰো অধিক ধন ব্যয় কৰি কিছু সামগ্ৰী ক্ৰয় কৰিছিল জিলা পৰিষদৰ সভাপতি আশিষ নাথে ৷ যাৰ বাবে অসন্তুষ্ট হৈ পৰিছে সভাপতি গৰাকীৰ বিৰুদ্ধে জিলা পৰিষদখনৰ আন আন সদস্য সকল ৷
সম্প্ৰতি এই বিৰ্তকিত জিলা পৰিষদৰ সভাপতি গৰাকীৰ বিৰুদ্ধে আগন্তুক সাত দিনৰ ভিতৰত উপযুক্ত ব্যৱস্থা গ্ৰহণ কৰিবলৈ দাবী জনাইছে জিলা পৰিষদখনৰ আন সদস্য সকলে ৷ অন্যথা সকলোৱে একেলগে পদত্যাগ কৰিব বুলি উল্লেখ কৰিছে ৷ মন কৰিবলগীয়া যে, জিলা পৰিষদখনৰ মুঠ সদস্য হৈছে 20 গৰাকী আৰু তাৰে 6 গৰাকী বিজেপিৰ সদস্য ৷
লগতে পঢ়কঃ যোগান বিভাগৰ বগা চাউলৰ ক’লা ব্যৱসায়
