কৰিমগঞ্জ, 4 ছেপ্তেম্বৰ : আজিৰ পৰা প্ৰায় ছমাহ পূৰ্বে কৰিমগঞ্জ সদৰ থানাৰ অন্তৰ্গত চেৰুলভাগত সংঘটিত হৈছিল এক নৃশংস হত্যাকাণ্ড । কিন্তু এই ছমাহে পাঁচগৰাকী হত্যাকাৰীক আটক কৰিবলৈ সক্ষম নহ’ল আৰক্ষী ।
কিন্তু শুকুৰবাৰে স্থানীয় ৰাইজে পাঁচগৰাকীৰ এগৰাকী অভিযুক্ত ৰিয়াজ উদ্দিনক আটক কৰিবলৈ সক্ষম হয় । আৰক্ষীয়ে নোৱাৰা কাম কৰি দেখুৱালে ৰাইজে । স্থানীয় ৰাইজে আৰক্ষীৰ নিৰ্লিপ্ততাৰ আঁৰৰ কাহিনীও দাঙি ধৰি কয়, অভিযুক্তক কৰায়ত্ব নকৰাৰ আঁৰত আছে বৃহৎ ধনৰ খেল ।
উল্লেখ্য যে, যোৱা মাৰ্চ মাহৰ সাত তাৰিখে কৰিমগঞ্জৰ চেৰুলবাগ গাঁৱৰ আব্দুল ছোফান নামৰ এগৰাকী ব্যক্তিক মূৰত কোঠাৰেৰে আঘাত কৰি হত্যা কৰিছিল একেখন গাঁৱৰে পাঁচজনীয়া এটা দুৰ্বৃত্তৰ দলে ৷ পিছে এই ঘটনাক লৈ এক অবাঞ্চিত পৰিস্থিতিৰ সৃষ্টি হয় যদিও আৰক্ষীয়ে ৰহস্যজনক ভাৱে চাৰিগৰাকী হত্যাকাৰীক গ্ৰেপ্তাৰ কৰা নাছিল ।
বৃহস্পতিবাৰে নিশা স্থানীয় ৰাইজে এই হত্যাকাণ্ডৰ মূল অভিযুক্ত হাৰিছ উদ্দিনকো আটক কৰি আৰক্ষীৰ হাতত গতাই দিয়ে ৷ লগতে অনতিপলমে বাকী দোষী সকলকো কৰায়ত্ব কৰি উপযুক্ত শাস্তি বিহিবলৈ আৰক্ষী অধীক্ষকৰ ওচৰত আবেদন জনায় । আনহাতে স্থানীয় লোক সকলে ক্ষোভ প্ৰকাশ কৰি বিভিন্ন শ্ল’গানও দিয়ে ।
