কৰিমগঞ্জ,4 নৱেম্বৰঃ কৰিমগঞ্জৰ জিলা পৰিষদ গঠনৰ বাবে কংগ্ৰেছে লক্ষাধিক ধনৰ লেনদেনত লিপ্ত হোৱাৰ অভিযোগ উত্থাপন কৰিছে বিজেপিৰ কৰিমগঞ্জ জিলা সমিতিয়ে ৷ ইতিমধ্যে উক্ত ঘটনা সংক্ৰান্তত অসম চৰকাৰৰ প্ৰাক্তন মন্ত্ৰী তথা সংসদীয় সচিব ছিদ্দিক আহমেদৰ অডিঅ' ভাইৰেল হোৱাক কেন্দ্ৰ জিলাখনৰ ৰাজনৈতিক মহলত তীব্ৰ প্ৰতিক্ৰিয়াৰ সৃষ্টি হৈছে ৷ কৰিমগঞ্জ জিলা বিজেপিৰ সভাপতি সুব্ৰত ভট্টাচাৰ্যই ঘটনাত সন্দৰ্ভত প্ৰতিক্ৰিয়া ব্যক্ত কৰি কয় যে,"নিৰ্বাচনত কিনা-বেচা কৰাটো কংগ্ৰেছৰ এক কালচা্ৰ ৷ কিন্তু ইমানবোৰ লেনদেন কৰাৰ পাছতো দলটো জয়ী হ'ব পৰা নাই ৷" আনহাতে জিলা পৰিষদ গঠনৰ নামত কংগ্ৰেছৰ ছিদ্দিক আহমেদ আৰু কমলাক্ষ দে পুৰকায়স্থৰ দৰে শীৰ্ষনেতা লেনদেনত লিপ্ত হোৱাটো জিলাখনৰ বাবে লজ্জাজনক বুলি অভিহিত কৰে বিজেপিৰ জিলা সভাপতিগৰাকীয়ে ৷
প্ৰাক্তন মন্ত্ৰী ছিদ্দিক আহমেদৰ ভাইৰেল হোৱা অডিঅ'ত কৰিমগঞ্জ জিলাৰ খালী হৈ থকা জিলা পৰিষদখন গঠনৰ বাবে 50 লাখ টকাৰ লেনদেন হোৱা বুলি অভিযোগ উত্থাপন কৰিছে বিজেপিৰ কৰিমগঞ্জ জিলা সমিতিয়ে ৷ নিলামবজাৰ জিলা পৰিষদৰ সদস্যা আফৰোজ পাৰভিনক জিলা পৰিষদৰ সভাপতি হিচাপে মনোনীত কৰাৰ বাবে 50 লাখ টকাৰ বুজাবুজি হোৱা বুলি উল্লেখ কৰে বিজেপিৰ জিলা সভাপতিগৰাকীয়ে ৷
উল্লেখ্য যে, যোৱা অক্টোবৰ মাহত টছৰ মাধ্যমেৰে গঠন কৰা হৈছিল কংগ্ৰেছৰ জিলা পৰিষদ ৷ কিন্তু প্ৰক্ৰিয়াত আসোঁৱাহ থকা বুলি ধৰা পৰাত উচ্চ ন্যায়ালয়ে বৰ্তমানৰ জিলা পৰিষদ সমিতিখন বাতিল কৰি পুনৰগঠনৰ নিৰ্দেশ প্ৰদান কৰিছিল ৷ তাৰেই পৰিপ্ৰেক্ষিতত অহা 7 নৱেম্বৰত গঠিত হ'ব কৰিমগঞ্জ জিলা পৰিষদ ৷
