কৰিমগঞ্জ, 12 জানুৱাৰীঃ কৰিমগঞ্জত বালি মাফিয়াৰ দৌৰাত্ম ৷ সকলো দেখি-শুনিও নিৰ্বিকাৰ জলসম্পদ বিভাগ ৷ কৰিমগঞ্জত এচাম অসাধু ব্যৱসায়ীয়ে অবৈধভাৱে বালিৰ বেহা চলাই থকাৰ অভিযোগ উত্থাপন হৈছে ৷ অভিযোগ অনুসৰি বন বিভাগৰ একাংশ বিষয়া কৰ্মচাৰীৰ সহযোগত এচাম বালি মাফিয়াই গোপনে বালিৰ অবৈধ বেহা চলাই থকাৰ বিষয় পোহৰলৈ আহিছে ৷ কৰিমগঞ্জৰ নিলাম বজাৰৰ কউটুকত জলসম্পদ বিভাগে নিৰ্মাণ কৰা লংগাই নৈৰ স্থায়ী মথাউৰি কাটি বালি খনন চলাই আছে বুলি অভিযোগ উত্থাপন হৈছে ৷ ইতিমধ্যে স্থানীয় ৰাইজে বন বিভাগ, জলসম্পদ বিভাগ, নিলামবজাৰৰ চক্ৰ বিষয়া, আৰু জিলা উপায়ুক্তৰ কাৰ্যালয়ত এই সম্পৰ্কে অভিযোগ দাখিল কৰিছিল যদিও কোনো ধৰণৰ ব্যৱস্থা গ্ৰহণ কৰা দেখা নগ’ল বিভাগীয় কৰ্তৃপক্ষসমুহৰ দ্বাৰা ।
উল্লেখ্য যে, কোটি টকা ব্যয় সাপেক্ষে নিৰ্মাণ কৰা এই স্থায়ী মথাউৰি খনাৰ ফলত ইয়াৰ পাৰ্শ্বৱৰ্তী এলেকাসমূহৰ বিস্তৃত কৃষিভূমি বানপানীত ডুব যোৱাৰ ফলত স্থানীয় লোকসকল যথেষ্ট অসুবিধাৰ সন্মূখীন হ’ব লগা হৈছে ৷ আনহাতে এচাম অসাধু বালি মাফিয়া বনমন্ত্ৰী পৰিমল শুক্লবৈদ্যৰ ঘনিষ্ঠ হোৱা বাবেই তেওঁলোকৰ বিৰুদ্ধে একো ব্যৱস্থা গ্ৰহণ কৰা নাই বুলি স্থানীয় ৰাইজে অভিযোগ উত্থাপন কৰে ৷
আৰু পঢ়কঃৰক্ষকে যেতিয়া ৰূপ লয় ভক্ষকৰ !
