ডিফু, ৯ অক্টোবৰ: কাৰ্বি আংলঙৰ শিলভেটাত পৰ্যটন থলী সমূহৰ গৰিমা বৰ্দ্ধনৰ বাবে অহা ১১ আৰু ১২ অক্টোবৰত দুদিনীয়া কাৰ্যসূচীৰে আৰম্ভ হ'ব চেৰিটি মটৰ চাইকেল ইভেণ্ট অনুষ্ঠানৰ ৷ এই সন্দৰ্ভত জিলা প্ৰেছ ক্লাবত এখন সংবাদমেল সম্বোধন কৰে কাৰ্বি আংলং মটক চাইকেল ক্লাৱৰ প্ৰতিষ্ঠাপক সভাপতি নকচাৰ কাথাৰ আৰু সম্পাদক ইৰাজ ইংতিয়ে ।
অহা ১১ আৰু ১২ অক্টোবৰত কাৰ্বিআংলং মটৰ চাইকেল ক্লাবৰ উদ্যোগত শিলভেটাত অনুষ্ঠিত হ'ব চেৰিটি ইভেণ্ট । উক্ত চেৰিটি ইভেণ্টত উত্তৰ- পূৰ্বাঞ্চলৰ লগতে দেশ-বিদেশৰ প্ৰায় ১৫০ মটৰ চাইক্লিষ্ট ৰাইডাৰে অংশ গ্ৰহণ কৰিব বুলি জানিবলৈ দিয়ে ৷ উক্ত অনুষ্ঠানটি উদ্বোধন কৰিব কাৰ্বি আংলং স্বায়ত্ত শাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ৷ ইয়াৰোপৰি সম্মানীয় আৰু বিশিষ্ট অতিথি হিচাপে জিলা উপায়ুক্ত মুকুল কুমাৰ শইকীয়া আৰু জিলা পৰ্যটন বিষয়াৰ লগতে গণ্য মান্য ব্যক্তি সকল উপস্থিত থাকিব বুলি সংবাদমেলযোগে সদৰি কৰে ৷ তাৰোপৰি উক্ত অনুষ্ঠানৰ ইভেণ্ট সমূহত শ্ল' বাইক ৰেচ্, মল্ল যুঁজ, বাইক লিফটিঙ ইত্যাদি প্ৰতিযোগিতা থাকিব বুলি জনায় ৷ এই অনুষ্ঠান যোগে কাৰ্বি আংলঙৰ পৰ্যটনথলী সমূহক বিশ্ব দৰবাৰত উন্নত ৰূপত প্ৰতিষ্ঠা কৰাৰ চেষ্টা কৰা হৈছে বুলি উদ্যোক্তা সকলে জানিবলৈ দিয়ে ৷
