কৰ’ণা ৰোগীৰ মৃতদেহ সৎকাৰক লৈ ডিফুত উত্তপ্ত পৰিস্থিতি

ডিফুত ক’ভিড 19ত আক্ৰান্ত ৰোগীৰ মৃত্যুক লৈ সষ্টি হৈছে উত্তপ্ত পৰিস্থিতিৰ ৷ ঘটনাস্থলীত ডিফু থানাৰ আৰক্ষী অধিক্ষক চিৰাজ ইংতি আৰু ডিফু নগৰ আৰক্ষী চকীৰ ভাৰপ্ৰাপ্ত বিষয়া বিতুপন চুতীয়াৰ নেতৃত্বত আৰক্ষীৰ এটা দলে উপস্থিত হৈ পৰিস্থিতি নিয়ন্ত্ৰণ কৰে ৷

ডিফু, 23 ছেপ্তেম্বৰঃ মঙলবাৰে কৰ’ণাত আক্ৰান্ত হৈ অৱশেষত ডিফু বজাৰৰ শ্ৰীশ্ৰী শনি মন্দিৰৰ পুৰোহিত গৰাকীৰ মৃত্যু হয় ৷ বিগত কিছুদিন ধৰি শ্বাস-প্ৰশ্বাসজনিত ৰোগত আক্ৰান্ত হৈ আছিল সপন চক্ৰৱৰ্তী নামৰ পুৰোহিত গৰাকী ৷ ইয়াৰ পিছতে ৰেপিড এন্টিজেন টেষ্টত তেখেতৰ দেহত ক’ভিড 19ৰ উপস্থিতি ধৰা পৰিছিল ৷ বুধবাৰে তেখেতৰ মৃতদেহৰ সৎকাৰৰ বাবে ডিফু ৰাজহুৱা শ্মশানঘাটলৈ নিয়াত শ্মশানঘাটৰ নিকটৱৰ্তী বাসিন্দা সকলে মৃতদেহ সৎকাৰৰ ক্ষেত্ৰত বাধা আৰোপ কৰে ৷ ইয়াৰ পিছতেই মৃতদেহ সৎকাৰৰ বাবে অহা লোক আৰু স্থানীয় লোকৰ মাজত বাক-বিতণ্ডাৰ সৃষ্টি হয় ৷

পৰিস্থিতি উত্তপ্ত হৈ পৰাত ঘটনাস্থলীত ডিফু থানাৰ আৰক্ষী অধিক্ষক চিৰাজ ইংতি আৰু ডিফু নগৰ আৰক্ষী চকীৰ ভাৰপ্ৰাপ্ত বিষয়া বিতুপন চুতীয়াৰ নেতৃত্বত আৰক্ষীৰ এটা দলে উপস্থিত হয় ৷ আনহাতে, স্বপন চক্ৰৱৰ্তীৰ মৃতদেহটো শ্মশানলৈ আনি তেখেতৰ পৰিয়ালৰ চাৰিজনকৈ লোকক পিপিই কীট প্ৰদান কৰি আঁতৰি যায় স্বাস্থ্যবিভাগৰ লোকে ৷ যাৰ বাবে স্বাস্থ্যবিভাগৰ লোক অবিহনেই মৃতকৰ পৰিয়ালে পিপিই কীট পৰিধান কৰি মৃতদেহৰ সৎকাৰ সম্পন্ন কৰে ৷

লগতে পঢ়ক-নগাঁও আৰক্ষীৰ জালত কুখ্যাত ড্ৰাগছ মাফিয়া মামা