বোকাজান, ২১ আগষ্টঃ- অসম-নগালেণ্ড সীমান্তৱৰ্তী পাহাৰীয়া জিলা কাৰ্বি আংলংৰ বোকাজান মহকুমাৰ অন্তৰ্গত ডিলাই আৰক্ষীয়ে মঙ্গলবাৰে জব্দ কৰে বৃহৎ পৰিমাণৰ বাৰ্মিজ সামগ্ৰী । ৩৬ নং ৰাষ্ট্ৰীয় ঘাইপথত ডিলাই আৰক্ষীৰ নিয়মীয়া তালাচীত চুবুৰীয়া ৰাজ্য নগালেণ্ডৰ ডিমাপুৰৰ পৰা গুৱাহাটীৰ বেলতলা অভিমুখী তিনিখন ট্ৰাক আৰু এখন টাটা ডি আই গাড়ীত ম্যানমাৰৰ পৰা মণিপুৰ-নগালেণ্ড হৈ অহা কৰবিহীন সামগ্ৰীসমূহ জব্দ কৰিবলৈ সক্ষম হয় আৰক্ষী । ডিলাই আৰক্ষীয়ে জব্দ কৰা এমএন-০৪-এ-৭৯৪৫, এনএল-০২-কিউ-২৯৪৮, এনএল-০১-এল-০২৮৭ নম্বৰৰ তিনিখন ট্ৰাক আৰু এএছ-১৫-চি-৬৪৬৬ নম্বৰৰ এখন ডি আই গাড়ীত ম্যানমাৰৰ পৰা অহা কৰবিহীন অবৈধ সামগ্ৰীসমূহৰ ভিতৰত বৃহৎ পৰিমাণৰ চিগাৰেট, কাপোৰকে আদি কৰি বিভিন্ন ধৰণৰ সামগ্ৰী আছে বুলি জানিবলৈ দিয়ে। প্ৰায় ৫০ লক্ষাধিক টকা মূল্যৰ কৰবিহীন এই অবৈধ সামগ্ৰীসমূহ উদ্ধাৰ কৰাৰ লগতে গাড়ীকেইখনৰ চালক আৰু হেণ্ডিমেনক আটক কৰি ঘটনা সন্দৰ্ভত আৰক্ষীয়ে ডিলাই থানাত এক গোচৰ পঞ্জীয়ন কৰি অধিক তথ্যৰ বাবে জেৰা অব্যাহত ৰাখিছে বুলি আৰক্ষী সূত্ৰে প্ৰকাশ ৷
উল্লেখ্য যে, বৃহৎ পৰিমাণৰ কৰ ফাঁকিৰে ম্যানমাৰৰ পৰা প্ৰথমে নগালেণ্ডৰ ডিমাপুৰলৈ অনা এই ম্যানমাৰৰ সামগ্ৰীসমূহ পাছত অসমৰ লগতে উত্তৰ-পূৰ্বাঞ্চলৰ বিভিন্ন প্ৰান্তলৈ প্ৰেৰণ কৰা হয় বুলি দীৰ্ঘদিনীয়া এক অভিযোগ আছে । নগালেণ্ডৰ ডিমাপুৰৰ পৰা ম্যানমাৰৰ এই সামগ্ৰীসমূহ ৩৬ নং আৰু ৩৯ নং ৰাষ্ট্ৰীয় ঘাইপথেদি ট্ৰাকটো বাদেই যাত্ৰীবাহী নৈশ বাছসমূহেও অধিক ভাড়া লাভৰ স্বাৰ্থত যাত্ৰীৰ সলনি এনে সামগ্ৰীসমূহ সৰবৰাহ কৰি আহিছে আৰু বিগত জুন মাহত খটখটি আৰক্ষীয়ে ৩৯ নং ৰাষ্ট্ৰীয় ঘাইপথত নিয়মীয়া তালাচীত ডিমাপুৰৰ পৰা তিনিচুকীয়া অভিমুখী তিনিখন নৈশ বাছৰ পৰা উদ্ধাৰ হোৱা কেইবা লক্ষাধিক টকা মূল্যৰ বাৰ্মিজ সামগ্ৰীয়ে তাকেই প্ৰমাণ কৰে ।
