কামৰূপ,10 জুন : কামৰূপ জিলাৰ ছয়গাঁৱৰ গৰৈমাৰীৰ আচলপাৰাত সংঘটিত,শিল্পীক লৈ চলা কাণ্ডটোৰ লগত জড়িত থকাৰ অভিযোগত আজি পুৱা ছয়গাঁও আৰক্ষীয়ে তিনিজন লোকক গ্ৰেপ্তাৰ কৰে ৷ ছয়গাঁও থানাৰ ভাৰপ্ৰাপ্ত আৰক্ষী বিষয়া ৰূপম হাজৰিকাৰ নেতৃত্বত দেওবাৰে ওৰেটো নিশা গৰৈমাৰী অঞ্চলত অভিযান চলোৱাৰ অন্তত সোমবাৰে পুৱা প্ৰায় 5 বজাত আৰক্ষীয়ে বিভিন্ন অঞ্চলৰ পৰা অভিযুক্ত কেইজনক গ্ৰেপ্তাৰ কৰিবলৈ সক্ষম হয় ৷
গ্ৰেপ্তাৰ কৰা লোককেইজন কালাতলী পথাৰৰ নিজামুদ্দিন আৰু ভিতৰদৱাৰৰ ৰকমত আলী বুলি জানিব পৰা গৈছে ৷ আনহাতে আয়োজক সমিতিৰ হৈ শিল্পী দলক চুক্তিবদ্ধ কৰা সঞ্জয় চৌধুৰী নামৰ লোকজনকো আৰক্ষীয়ে সোধপোচৰ বাবে আটক কৰিছে ৷ বৰ্তমান তিনিওজনকে আৰক্ষীয়ে মাৰাথন জেৰা অব্যাহত ৰাখিছে ৷ উল্লেখ্য যে গৰৈমাৰীৰ আচলপাৰা কাণ্ডত 9 জুনৰ পুৱা দুজন লোকক আটক কৰাৰ পিচতে আজি পুৱা আৰক্ষীয়ে পুনৰ তিনিজন লোকক আটক কৰে ৷ এই পৰ্যন্ত আচলপাৰা ঘটনাৰ স'তে জড়িত থকাৰ অপৰাধত 5 জন লোকক গ্ৰেপ্তাৰ কৰা হয় ৷ ইপিনে জাতীয় সেনা অসমে,এই ঘটনাৰ লগত জড়িত লোকসকলক কৰায়ত্ত কৰি উচিত শাস্তিৰ দাবী জনাই ছয়গাঁও থানাত এখন এজাহাৰ দাখিল কৰে ৷
